Վրաստանի ու ԱՄՆ-ի համագործակցությունը հասել է ամենաբարձր մակարդակի. Վրաստանի վարչապետ
Վրաստանի ու Միացյալ Նահանգների միջև համագործակցությունն ու գործընկերությունը հասել է երկու երկրների հարաբերությունների ամբողջ ժամանակահատվածում ամենաբարձր մակարդակի: Այդ մասին, ինչպես փոխանցում է ՏԱՍՍ գործակալությունը, հայտարարել է Վրաստանի վարչապետ Մամուկա Բախտաձեն՝ «Իմեդի» հեռուստաընկերության ուղիղ եթերում:
«Նախագահ Դոնալդ Թրամփի վարչակազմի օրոք Վրաստանի ու ԱՄՆ-ի միջև ռազմավարական գործընկերությունն ու համագործակցությունը հասել է ամենաբարձր մակարդակի: Մենք մտադիր ենք ինտենսիվ զարգացնել այդ համագործակցությունը»,- ասել է Նյու Յորքում գտնվող վրաց քաղաքական գործիչը:
Ըստ նրա՝ այժմ պատմական հնարավորություն է ընձեռվել ավելի խորացնելու այդ համագործակցությունը:
Ինչպես հայտնել էր Վրաստանի կառավարության մամուլի ծառայությունը, Բախտաձեն սեպտեմբերի 27-ին ելույթ կունենա Նյու Յորքում ՄԱԿ-ի Գլխավոր վեհաժողովի 73-րդ նստաշրջանում, նա նաև հանդիպումներ կունենա Եվրամիության բարձրաստիճան պաշտոնյաների, մի շարք երկրների առաջնորդների հետ:
Հիշեցնենք, որ նա սեպտեմբերի 10-ին այցելել էր Հայաստան: