Ամեն պահի պատրաստ ենք Կառավարության կիրառած փոփոխությունների շրջանակում քաղաքական գործունեություն ծավալել․ Վ․ Ավետիսյանը՝ արտահերթ խորհրդարանական ընտրությունների մասին
Մենք հայեցակարգային այլ մոտեցում ունենք, մենք անցումային փուլը պատկերացնում ենք անցումային փուլի բավարար ժամկետով, անցումային ժողովրդավարության մեխանիզմներով, որը ներառում է կոշտ կառավարում, անցումային արդարադատության, լյուստրացիայով, նոր Սահմանադրություն ընդունելով, նոր հետո արդեն արտահերթ խորհրդարանական ընտրություններով։
Tert.am-ի հետ զրույցում նման տեսակետ հայտնեց «Սասնա Ծռեր» կուսակցության նախաձեռնող խմբի անդամ Վարուժան Ավետիսյանը։ Միևնույն ժամանակ նա շեշտեց, որ իրենք հաշվի են առնում նաև առկա իրողությունները և կարող են համահունչ գնալ հայաստանյան քաղաքական ներկայիս իրավիճակին։
«Ամեն պահի պատրաստ ենք նաև Կառավարության կիրառած փոփոխությունների մարտահրավերների շրջանակում քաղաքական գործունեություն ծավալել։ Մենք ասել ենք, որ բոլոր դեպքերում մինչև ընտրություններ, մինչև երկրի կայունացում ընտրությունների հիման վրա պետական կառավարման մարմինների ձևավորումը, սատարում ենք հեղափոխությանն ու վարչապետ Փաշինյանին։ Բայց հասկանալի է, որ ընտրությունների ժամանակ կլինի մրցակցային վիճակ, ու մեր տեսակետները պետք է տարբերվեն, պետք է կառուցողական լինենք, փորձենք ոչ թե պայքարել որպես հակառակորդներ, այլ յուրաքանչյուրս ներկայացնենք մեր տեսլականը»,- ասաց նա։
Ավետիսյանը նկատեց, որ արտահերթ խորհրդարանական ընտրությունների ժամանակ երկակի ու բարդ վիճակ է լինելու։ Ըստ նրա՝ մի կողմից պետք է հեղափոխությունը զարգացնել ու պահել, մյուս կողմից էլ քաղաքական գործընթաց է, որին պետք է մասնակցել։ Սակայն Վարուժան Ավետիսյանը վստահ է, որ իրենց կհաջողի գործել կառուցողական դաշտում՝ իրենց տեսակետները ներկայացնելով հանդերձ։ Վերջինս նաև նշեց, որ արտահերթ խորհրդարանական ընտրություններն ավելի շուտ անցկացնելու պարագայում իրենց կուսակցությունը՝ «Սասնա Ծռերը», որևէ խնդիր չի ունենա։
«Համոզված եմ՝ ամեն ինչ կհասցնենք, սեպտեմբերի 29-ին համագումար ենք անցկացնելու։ Կարծում եմ, որ, այո, կհասցնենք մեր ծրագրերը ներկայացնել ժողովրդին, որովհետև մենք նորություն չենք, պարզապես որպես կուսակցություն ենք նոր կազմավորվում, բայց որպես քաղաքական ուժ նորություն չենք մեր հայացքներով, տեսակետներով ու ճանաչողությամբ։ Անշուշտ, որոշակի ժամանակ ունենալը դրական ազդեցություն կունենար, բայց ավելի շուտ անցկացնելը կատաստրոֆա չենք համարում»,- ընդգծեց Վարուժան Ավետիսյանը։
Ինչ վերաբերում է դիտարկումներին, որ Երևանի ավագանու ընտրությունները վարչապետ Նիկոլ Փաշինյանին արտահերթ խորհրդարանական ընտրություններ անցկացնելու մանդատ տվեցին, Վարուժան Ավետիսյանը նշեց․ «Մենք համակարծիք ենք, որ ընտրությունները մանդատ էին վարչապետին հեղափոխությունն իր բովանդակային առումով ամբողջությամբ և մինչև վերջ իրականացնելու համար։ Բնականաբար, դրա համատեքստում նաև նոր արտահերթ խորհրդարանական ընտրությունների կազմակերպումն է, բայց ոչ միայն սրա համար։ Մենք շատ կցանկանայինք, որ վարչապետն օգտագործեր սա մեր պատկերացրած ձևով անցումային փուլը գլուխ բերելու համար»։
Հիշեցնենք, որ վարչապետ Նիկոլ Փաշինյանը հայտարարել է, որ ԱԺ արտահերթ ընտրությունները պետք է անցկացնել ավելի վաղ, որպեսզի առավել շուտ սկսվի տնտեսության վերականգնման ընթացքը։