Փաշինյանի և Ալիևի պայմանավորվածությունները Վիեննայում, Սանկտ Պետերբուգում և Ժնևում եղած, բայց Ալիևի պատճառով թղթի վրա մնացած համաձայնությունների իմաստի շրջանակում են. Ա. Աշոտյան
Եթե Դուշանբեում Ալիևի հետ ոտքի վրա ձեռք բերված պայմանավորվածությունները սահմանային միջադեպերը կանխելու և նոր զոհեր չունենալու հետ կապված իրոք կայուն և գործնական արդյունք տան, ապա ապրի մեր վարչապետը։ Այս մասին ֆեյսբուքյան գրառման մեջ նշել է ԱԺ ՀՀԿ խմբակցության պատգամավոր, ԱԺ արտաքին հարաբերությունների հանձնաժողովի նախագահ Արմեն Աշոտյանը:
«Փաստացի այդ պայմանավորվությունները Վիեննայում, Սանկտ Պետերբուգում և Ժնևում եղած, բայց Ալիևի պատճառով թղթի վրա մնացած համաձայնությունների իմաստի շրջանակում են՝ առանց միջազգային ինստիտուցիոնալ մեխանիզմների։
Ողջ սրտով ուզում եմ կիսել իր լավատեսությունը և ինքնավստահությունը այդ հարցում։
Իսկ եթե ոչ, ապա ... չէ, հիմա չեմ քննարկի այդ տարբերակը։
Խաղաղ ծառայություն մեր զինվորներին»,-եզրափակել է նա։
Հիշեցնենք, որ ՀՀ վարչապետը ֆեյսբուքյան ուղիղ եթերում ներկայացրել էր այսօր Դուշանբեում Ադրբեջանի նախագահի հետ ոչ ֆորմալ հանդիպման մի քանի մանրամասներ: «Մենք պայմանավորվեցինք, որ մեր ՊՆ-ներին հանձնարարություն տանք կոնկրետ քայլեր ձեռնարկել սահմանագծում և ընդհանրապես լարումն իջեցնելու վերաբերյալ, սահմանային միջադեպերը կանխելուն ուղղված քայլեր են դրանք»,-հայտարարել է Նիկոլ Փաշինյանը: