Իլհամ Ալիևի հետ հանդիպումը թռուցիկ էր, բայց կարևոր. մթնոլորտը փոխելու դրական իմպուլսներ կան. Ստեփան Գրիգորյան
Թռուցիկ, բայց կարևոր հանդիպում էր, մթնոլորտը փոխելու դրական իմպուլսներ կան. Tert.am-ի հետ զրույցում ասաց Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը` անդրադառնալով ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի կարճատև հանդիպմանը և ձեռք բերված պայմանավորվածությանը:
Հիշեցնենք, որ Փաշինյանն ու Ալիևը կարճատև զրույց են ունեցել Դուշանբեում և, ըստ ՀՀ վարչապետի՝ Ալիևի հետ ձեռք են բերվել պայմանավորվածություններ՝ հրադադարի ռեժիմի խախտումները կանխելու վերաբերյալ: Բացի այդ, ըստ Նիկոլ Փաշինյանի՝ Իլհամ Ալիևի հետ պայմանավորվել են նաև, որ օպերատիվ կապի որոշակի կոմունիկացիա պիտի ստեղծվի, ինչպես նաև խնդիրները պետք է լուծվեն բանակցությունների միջոցով:
«Դուշանբեում իրենք կարողացան թռուցիկ, բայց այդուամենայնիվ հանդիպել, որն ինչ-որ չափով անսպասելի էր, քանի որ նախօրոք պայմանավորվածություններ չկային: Միգուցե դա նույնիսկ լավ էր, եթե պայմանավորվածություններ լինեին, ուրեմն ծանր զրույց կլիներ, ու կարող է՝ անարդյունք, բայց հիմա, քանի որ թռուցիկ էր, հասցրին կարծիքներ հայտնել և նման հարցում պայմանավորվել: Ես համարում եմ, ավելի լավ է խոսել, քան կրակել»,-ասաց նա:
Ըստ Ստեփան Գրիգորյանի՝ հանդիպմանը կարևոր նյուանսներ կային. «Պայմանավորվածությամբ հաստատվեց, որ Նիկոլ Փաշինյանը շարունակում է տանել այն գիծը, որ եթե ուզում ենք լուծել ղարաբաղյան հարցը, եթե ուզում ենք վերսկսել բանակցությունները, ապա անպայման պետք է փոխվի մթնոլորտը, պետք է հրաժարվենք զինադադարի խախտումներից և անպայման պետք է այդ ուղղությամբ քայլեր անենք:
Փաստորեն, իր օրակարգում ստացվեց այդ խոսակցությունը, կարճ, բայց ստացվեց, ի վերջո եթե չեն կրակում ու հուսով են, որ ինչ-որ ժամանակ հարյուր տոկոսով չեն կրակի, դա նշանակում է՝ իր կոնցեպտը սկսեց աշխատել, և Ալիևը այդ խաղի կանոնները գուցե սկսի ընդունել»,-ասաց նա:
Քաղաքագետը նկատեց, թե միամիտ չպետք է լինել՝ հավատալու, որ զինադադարը հավերժ կարող է տևել: «Բայց այն փաստը, որ ինչ-որ ժամանակահատվածում չեն կրակի, արդեն դրական է»,-ասաց նա:
Անդրադառնալով կոմունիկացիայի ստեղծմանը երկու կողմերի միջև՝ Ստեփան Գրիգորյանը նշեց, որ դրա մասին շատ է խոսվել, որ պետք է վերականգնվի: «Նախկինում դա կար, պատերազմից անմիջապես հետո՝ 95-ից կար և եթե վերականգնվի, դա շատ կարևոր մեխանիզմ կլինի՝ կանխելու հրադադարի խախտման երևույթը, որը շատ հաճախ է լինում»,-ասաց նա:
Ի դեպ, Ստեփան Գրիգորյանը համակարծիք չէ այն դիրքորոշման հետ, որ Վիեննայի ու Սանկտ Պետերբուրգի պայմանավորվածությունները «ջրվեցին», և որ Փաշինյանը մինչև վերջ չի ըմբռնել Ադրբեջանի ձգտումների սահմանաչափը: «Նիկոլ Փաշինյանը դնում է հստակ խնդիր, որ մթնոլորտը պետք է փոխվի, եթե իրենք չեն հասկանում, թե ինչ է նշանակում մթնոլորտի փոխվելը, ես բացատրեմ՝ մթնոլորտը փոխելը նշանակում է, որ Ադրբեջանը դադարեցնում է կրակելը, նշանակում է, որ Ադրբեջանը համաձայնում է ԵԱՀԿ ռազմական դիտորդների թիվն ավելացնել, նշանակում է, որ այդ հայտարարությունները, ելույթները՝ հակահայկական, դադարեցվեն, մթնոլորտ փոխելը նշանակում է, որ կողմերը իրականացնում են Վիեննայի և Սանկտ-Պետերբուրգի պայմանավորվածությունները»,-եզրափակեց նա: