Թուրքիան պետք է դառնա ժողովրդավարական պետություն, որպեսզի փոխհատուցի ողբերգության հետևանքների համար. Եվրախորհրդարանի պատգամավորն այցելել է Ծիծեռնակաբերդ
Եվրախորհրդարանի պատգամավոր Էլենի Թեոխարուսի գլխավորած պատվիրակությունը ՀՅԴ Եվրոպայի հայ դատի հանձնախմբի ղեկավար Գասպար Կարապետյանի ուղեկցությամբ սեպտեմբերի 29-ին այցելել է Ծիծեռնակաբերդի հուշահամալիր։ Այս մասին հայտնում են ԱԺ Լրատվության և հանրության հետ կապերի վարչությունից
Հյուրերն ուշ երեկոյան ծաղիկներ են խոնարհել 1915 թվականի Հայոց ցեղասպանության զոհերի հիշատակը հավերժացնող անմար կրակի մոտ, լռությամբ հարգել Սուրբ նահատակների հիշատակը։
Եվրախորհրդարանի պատվիրակության ղեկավարը, նշելով, թե անչափ հուզված են, փաստել է, որ Թուրքիան պետք է ճանաչի հայերի, ինչպես նաև Փոքր Ասիայի տարածքում բնակված հույների ու մյուս քրիստոնյա ժողովուրդների ցեղասպանությունը։
«Թուրքիան պետք է դառնա ժողովրդավարական պետություն, որպեսզի նաև փոխհատուցի ողբերգության հետևանքների համար»,-ասել է Էլենի Թեոխարուսը։
Լեռնային Ղարաբաղի հիմնախնդրի կարգավորման առնչությամբ Եվրախորհրդարանի պատվիրակության ղեկավարը նշել է, որ Արցախի ժողովուրդն արդեն ինքնորոշվել է, և հարցը պետք է լուծվի միայն խաղաղ ճանապարհով։
Նշենք, որ Արցախյան գոյամարտի տարիներին ԼՂՀ-ում իրականացրած բարեգործական առաքելությունների, արտերկրում Արցախի Հանրապետության քաղաքացիների իրավունքները և օրինական շահերը պաշտպանելու համար, վերջերս, Էլենի Թեոխարուսն արժանացել է Ստեփանակերտի պատվավոր քաղաքացու կոչման: