Մեկ ժամ լաց էի լինում. «ՎԻԱ Գրա» խմբի նախկին մեներգչուհին պատմել է իր կյանքի վատագույն ելույթի մասին
Ռուսական էստրադայի «ՎԻԱ Գրա» խմբի նախկին մեներգչուհի Աննա Սեդոկովան Instagram-ի իր էջում պատմել է կորպորատիվ խնջույքի ժամանակ ելույթի մասին, որն անվանել է վատագույններից մեկն իր կյանքում: Այս մասին հայտնում է РИА Новости-ն:
«Քիչ առաջ տեղի է ունեցել կյանքիս վատագույն համերգներից մեկը: Արդեն մեկ ժամ է՝ համարում պառկած լաց եմ լինում: Ցանկանում եմ լվացվել և ինձնից մաքրել այդ ամբողջ դժոխային համն ու բույրը», - գրել է երգչուհին:
Ինչպես երգչուհին խոստովանել է, իրեն ցավ է պատճառել ունկնդիրների անտարբերությունը:
«Ահա դուրս ես գալիս բեմ, թռչում ես՝ թողնելով նրան, ում սիրում ես, աշխատում ես թիմի հետ, զուգվում-զարդարվում ես, աղոթում ես բեմից առաջ, իսկ հետո դուրս ես գալիս… Իսկ մարդիկ նայում են քեզ վրա, ինչպես ծաղրածուի», - գրել է Սեդոկովան:
Նա ընդգծել է, որ երազում է դառնալ այնպիսի արտիստ, որը ստիպված չի լինի «նման ստորացում» ապրել: Նրա խոսքով՝ այժմ նա դա ստիպված է անել ընտանիքը պահելու համար: