Մեր կառավարության քաղաքականության արդյունքում ՔԿՀ-ները բեռնաթափվել են. Արտակ Զեյնալյան
ԱԺ արտահերթ նիստին «Էրեբունի-Երեւանի հիմնադրման 2800-ամյակի և Հայաստանի առաջին Հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» նախագծի քննարկմանը զեկուցող ՀՀ արդարադատության նախարարի ժամանակավոր պատշտոնակատար Արտակ Զեյնալյանին ՀՀԿ խմբակցության պատգամավոր Մարգարիտ Եսայանը հարցրեց, թե ինչպես են բեռնաթափվել քրեակատարողական հիմնարկները:
«Սա մեր իշխանությունների կառավարության քաղաքականության արդյունքն է, որ ՔԿՀ-ները բեռնաթափվել են, մեծ թվով պայմանական վաղաժամկետ ազատվել են, այս ինստիտուտը գործում է»,-ասաց նա և նշեց նաև, որ կալանքի իրավակիրառական պրակտիկան է բարելավել, և նախկինի նման այդքան շատ չեն նշանակվում կալանքները:
Արձագանքելով՝ Մարգարիտ Եսայանն ասաց, որ այնուամենայնիվ բազմամարդ էին կալանավայրերը: «Լիքն էին կալանավորման վայրերը, այդ միանգամից քանի հազար հոգու բաց թողեցիք, որ հանկարծ կալանավայրերում այլևս տեղերը ազատվել են, երբվանից բացեցիք կալանավայրերի դռները»,-ասաց նա:
Արտակ Զեյնալյանն ասաց, որ կալանավայրերի դռները չեն կարող բաց լինել, այդ ամենը իրականացվել է օրինականության սահմանում: «Երբ ես ստանձնել եմ նախարարի պաշտոնը, մեկ երկու ՔԿՀ-ում եղել են խցեր, որ մի մահճակալի վրա մեկից ավելի անձ է քնել հերթով, այս կառավարության պաշտոնավարման ժամանակ այս խնդիրը լուծվել է»,-ասաց նա:
Հիշեցնենք, որ Արտակ Զեյնալյանը նախագիծը զեկուցելուց առաջ հայտնել է, որ ՔԿՀ-ներում կալանավորված և դատապարտված անձանց թվաքանակն է 2888, ամբողջ մահճակալների թիվը՝ 5346: