Քարոզարշավում նկատելի կլինի շտապողականություն, ինչի արդյունքում կշահեն 1-2 ուղերձ ունեցող ուժերը․ քաղտեխնոլոգ
Արտահերթ խորհրդարանական ընտրություններում նոր քաղաքական տեխնոլոգիաներ կկիրառվեն: Tert.am-ի հետ զրույցում նման դիտարկում արեց քաղաքական տեխնոլոգաների մասնագետ Հայկ Կիրակոսյանը:
«Դրանց կիրառումը պայմանավորված է լինելու այն սուր ժամանակային գործոնի հետ, որը լինելու է նախընտրական շրջանում․ պաշտոնապես 12 օր ժամանակ ունեն քաղաքական ուժերը քարոզարշավն իրականացնելու համար: Մենք կունենանք, իհարկե, նկատելի շտապողականություն, ինչի արդյունքում կշահեն այն քաղաքական ուժերը, որոնք կկենտրոնանան 1-2 ուղերձների վրա, որովհետև ավելին ընտրողն այդ բազմազանության մեջ չի կարող ֆիքսել»,- ասաց նա:
Հայկ Կիրակոսյանի խոսքով՝ արտահերթ խորհրդարանական ընտրությունների քարոզարշավում, իհարկե, սպասվում են, ուղիղ եթերով միացումներ, սոցցանցերում ակտիվություն, բայց չեն բացառվում նաև՝ թեկնածուների բնակարանային այցելությունները: «Դրանք նաև ուղիղ եթերով կհեռարձակվեն: Անկուսակցականներին թիմում ներգրավելը ևս կարելի է դիտարկել որպես քաղաքական տեխնոլոգիա»,- ասաց նա:
Հայկ Կիրակոսյանը նաև չբացառեց քաղաքական սև՝ «թացը չորի հետ» խառնելու տեխնոլոգիաների կիրառում: «Դա այն է, որ որևէ քաղաքական ուժի ներսում կփորձեն փնտրել և ներկայացնել հին քաղաքական ուժերի հետքեր: Չբացառենք, որ, օրինակ, ՔՊ-ի ներսում կբացահայտվեն նախկին ՀՀԿ-ականներ կամ այլ գործիչներ, որոնք նպատակ կունենան վարկաբեկել կուսակցությանը: Չեմ բացառի, որ օրինակ, բացահայտվի, որ այդ ցուցակում առաջադրված է մեկը, ով հարձակվել է Էրեբունի դեպքերի ժամանակ ցուցարարներից մեկի վրա: Անող կողմը գիտի՝ ինչ է անում, իսկ ընդունող կողմը հնարավոր է՝ չկարողանա հետևել ամեն ինչին»,- ասաց նա:
Ինչպե՞ս մրցել հեղափոխությունից հետո ժողովրդի բացարձակ մեծամասնության համակրանքը վայելող «Իմ քայլը» դաշինքի հետ, ինչպե՞ս լինել ընդդիմություն, չարժանանալով հասարակության հակակրանքին: Հարցադրումներին քաղաքական տեխնոլոգիաների մասնեգետը պատասխանեց․
«Եթե ֆորսմաժորային որևէ բան չլինի, ապա «Քաղաքացիական պայմանագիր» կուսակցության բարի համբավը կպահպանվի, և Երևանի ավագանու ընտրություններում գրանցված արդյունքները կարտացոլվեն խորհրդարանական ընտրություններին: Դա նշանակում է, որ իրենց վատը չկամեցող քաղաքական ուժերը հանդես չեն գալու գործող իշխանությանը վարկաբեկելու ճանապարհով և չեն փորձելու «Իմ քայլը» դաշինքի հաշվին միավորներ հավաքել»:
Հայկ Կիրակոսյանի խոսքով՝ որոշ քաղաքական ուժեր այնուամենայնիվ խելամիտ են գտնվել և որոշում են կայացրել՝ չմասնակցել ընտրություններին՝ լավ հասկանալով իրենց ներուժի հնարավորությունները:
«Փոխարենը շատ շահեկան կլինի կոնտրաստ ապահովելը առաջիկա ընտրություններին: Եթե ՔՊ-ին որպես լիբերալ ուժ ընկալենք, ապա ազգային ուժերի ներգրավածությունը շատ հետաքրքրական կլինի: Լավ կլինի նրանք ևս ՔՊ-ի հաշվին չփորձեն միավորներ հավաքել»,- ասաց նա:
Անդրադառնալով նախկին իշխանությունների՝ Հանրապետականների ընտրություններին մասնակցելուն, նա նշեց, որ ռեբրենդինգի կարիք կա: «Զարմանալի է պարզապես, որ իրեն սելֆիի ձողի հետ համեմատող քաղաքական ուժ ներկայացնող անձը մասնակցում է ընտրություններին: Երևի, ցինիզմն է որպես քաղաքական տեխնոլոգիա կիրառվում: Ես նկատում եմ, որ կա ուժերը ցրելու նպատակ, այսինքն՝ հասարակության մոտ հակվածություն ստեղծելու՝ քվեարկեն տարբեր ուժերի օգտին և նվազեցնեն «Իմ քայլը» դաշինքի ձայները: Դա կանխատեսելի է»,- ասաց նա:
Հիմա, ըստ Հայկ Կիրակոսյանի, քաղաքական ուժերը հասկացել են քաղաքական տեխնոլոգիաների կիրառման դերն ու անհրաժեշտությունը: Նա նկատեց, որ դա կրկնակի գնահատվելու է հենց այս ընտրություններում, քանի որ մաքսիմալ զրոյացվելու են լծակների կիրառումը, կոռուպցիան:
«Դա բերում է նրան, որ եթե չեն կարող փողով գնել, չեն կարողանա անել լցոնումներով, «կառուսել խաղալով», ապա պետք է փիար, քաղաքական տեխնոլոգիաներ կիրառեն, ցույց տան, որ իրենք լավն են, կարող են ինչ-որ արժեքավոր բաներ անել: Բայց այստեղ խնդիր կա․ բոլոր նրանք, ովքեր տասը անգամ կոկորդիլոսի արցունքներ են թափել, հենց կոկորդիլոսի համբավ էլ ձեռք են բերել, և ժողովրդին թերագնահատելն էլ, ինչպես բազմիցս տեսանք, սխալ է»,- ասաց նա:
Անդրադառնալով խորհրդարանական ընտրություններին մասնակցող քաղաքական ուժերի ներկայացրած ցուցակների առաջնորդներին՝ քաղաքական տեխնոլոգիաների մասնագետը նկատեց՝ այս հարցում ընտրություն կատարելիս հիմնվել են նրա վրա, թե ինչ վարկանիշ ունեն այդ մարդիկ:
«Այնուամենայնիվ, քաղաքական ուժերին ընտրելիս, մարդիկ անձնավորում են փնտրում, և եթե անգամ կուսակցության անունը լինի՝ «Երկնքից ոսկի է թափվում», այնուամենայնիվ կուսակցությանը անձերով են ճանաչում»,- ասաց նա:
Ըստ նրա՝ «Իմ քայլը» դաշինքի դեպքում ցուցակը առաջնորդող Նիկոլ Փաշինյանին ընտրելը միանգամայն սպասելի էր, Հանրապետականների դեպքում՝ Վիգեն Սարգսյանին ընտրելը լավագույն լուծումն էր, Դաշնակցության դեպքում՝ Արմեն Ռուստամյանին, «Սասնա ծռեր»-ի դեպքում՝ Վարուժան Ավետիսյանին ընտրելը ևս ողջամիտ է:
«Անձնավորված մոտեցումը շատ ողջունելի է և առողջ, բայց դա նաև պետք է արտացոլվի հաջորդող անունների պարագայում․ միայն առաջին համարի համար չկարևորվի: Մարդիկ ցանկանում են տեսնել, թե Նիկոլ Փաշինյանինց հետո ով է, և նույն տրամաբանությամբ բոլորին հետաքրքիր է, թե Վիգեն Սարգսյանի հետո երկրորդն ով է»,- ասաց նա: