Յոահիմ Լյովը ցորենի գարեջուր կհյուրասիրի Մյուլերին` Գերմանիայի հավաքականում 100-րդ խաղն անցկացնելու առթիվ
Գերմանիայի հավաքականի գլխավոր մարզիչ Յոահիմ Լյովն Ազգերի լիգայի խմբային փուլի վերջին տուրի` Հոլանդիայի հետ կայանալիք խաղից առաջ խոստացել է ցորենի գարեջուր հյուրասիրել թիմի հարձակվող Թոմաս Մյուլերին, որի ակտիվում դեռևս 99 հանդիպում կա բունդեսթիմի կազմում.
«Թոմասը մեծ հարգանքի է արժանի: Նա հազվադեպ է վնասվածք ստացել, միշտ կազմ և պատրաստ է եղել` հանուն ազգային ընտրանու:
Եթե նա իր 100-րդ հանդիպումն անցկացնի հավաքականի կազմում, ես նրան կփոխհատուցեմ ցորենի գարեջրով»,- Լյովի խոսքերն է փոխանցում Bayern & Germany-ն:
Հավաքականի կազմում անցկացրած 99 խաղում «Բավարիայի» հարձակվողը 38 գոլի և 36 գոլային փոխանցման հեղինակ է դարձել: 2014 թվականին նա հաղթել է աշխարհի առաջնությունում:
Գերմանիա-Հոլանդիա հանդիպումը կկայանա այսօր` նոյեմբերի 19-ին: Գերմանացիները խմբում վերջին հորիզոնականն են զբաղեցնում և այլևս չեն խուսափի B դիվիզիոնում հայտնվելուց, իսկ հոլանդացիներին նույնիսկ ոչ-ոքին բավարար կլինի, որպեսզի շրջանցեն Ֆրանսիային և դուրս գան մրցաշարի փլեյ-օֆֆ: