Չի եղել մի դեպք, որ նախկին իշխանությունները պարտվողական դիրքորոշում արձանագրած լինեն ՀԱՊԿ-ի հետ բանակցություններում. Վահրամ Բաղդասարյան (տեսանյութ)
Նման հռետորաբանությունն ընդունելի չէ դաշնակից և բարեկամ երկրների միջև. ԱԺ ճեպազրույցների ժամին նման տեսակետ հայտնեց ՀՀԿ խմբակցության ղեկավար Վահրամ Բաղդասարյանը՝ անդրադառնալով Բելառուսի ԱԳՆ-ի պատասխանին ՀՀ վարչապետին, որ մեծ քաղաքականության մեջ պետք է առաջնորդվել ոչ թե «փողոցային ժողովրդավարության» կանոններով, այլ ընդունված դիվանագիտական արարողակարգի բավականին հստակ նորմերով:
«Որովհետև ՀԱՊԿ-ը մեկ ընտանիք է, ի սկզբանե բացթողումեր եղել են մեր իշխանությունների կողմից, և մենք զգուշացրել էինք, որ Խաչատուրովի նշանակումը ՀԱՊԿ անդամ երկրների կողմից համաձայնեցված էր, և եթե հետապնդում իրականացվեր նրա նկատմամբ, և եթե պետք է կալանավորվեր, ապա պետք է էթիկայի նորմերից ելնելով տեղյակ պահվեր ղեկավարներին: Լարումը դրանից առաջացավ, և կանխատեսելի էր, որ կորցնելու ենք այդ տեղը (ՀԱՊԿ գլխավոր քարտուղար-խմբ.), և բոլոր նախանշանները կային հռետորաբանության մեջ»,-ասաց նա և նշեց, որ Փաշինյանը կորոշի, թե ինչպես կդրսևորի իրեն դեկտեմբերի 6-ին Սանկտ-Պետերբուրգում:
«Բայց այս լարվածությունը ձեռնտու չէ մեր հետագա քաղաքական քայլերի համար, սա կարող է ունենալ բավական տհաճ հետևանք, ինչքան շուտ այդ հռետորաբանությանը վերջ դրվի, և իրար հասկանան, այդքան լավ, վերջիվերջո, ՀԱՊԿ-ը մեծ ընտանիք է, և մենք այդ ընտանիքի հետ բավական երկար գործ ունենք կատարելու»,-ասաց նա:
Իսկ թե համաձայն է, որ ինչպես Նիկոլ Փաշինյանը ասաց՝ Բելառուսը և Ղազախստանը պետք է բացատրություն տան, թե ինչու են փակ բանակցությունները Ադրբեջանին հայտնում, Վահրամ Բաղդասարյանն ասաց, որ, իհարկե, ՀՀ-ի համար ցանկալի չէ, որ փակ հանդիպումից հետո հայտնվում է Ադրբեջանի դեսպանը, և նման քննարկում է կատարվում:
«Բայց դա կախված է նրանից, թե ինչ պայմանավորվածություն է ձեռք բերվել փակ հանդիպման ժամանակ, մենք տեղյակ չենք՜ հանդիպումը փակ է եղել, և ինչ են պայմանավորվել, ով է խախտել, դա կարծես բացված չէ: Յուրաքանչյուրն ունի իր կարծիքը, հայկական կողմն իր կարծիքն է հայտնում, նրանք ավելի կոշտ պատասխան տվեցին, նրանք հանդիպմանը կպարզաբանեն, և բոլորը հանդես կգան հայտարարությամբ: Մենք պետք է ֆիքսենք, որ Ադրբեջանը ՀԱՊԿ-ի հետ որևէ առնչություն չունի, չգիտեմ՝ ում բարեկամն է, բայց առնչություն չունի»,-ասաց նա:
Իսկ թե գտնում է, որ ՀՀԿ իշխանության օրոք էլ կար նույն խնդիրը, երբ Բելառուսն ու Ղազախստանը գործում են ի շահ Ադրբեջանի և ընդդեմ ՀՀ-ի, ՀՀԿ պատգամավորը պատասխանեց, որ եղել են նման զգացողություններ: «Բայց նման սկանդալներ մեր իշխանության օրոք որևէ անգամ չեն եղել, դա դիվանագիտական բանակցությունների միջոցով պետք է հարթվի և ոչ թե մասսայական, ամբողջ աշխարհի աչքի առաջ լինի:
Սա արդեն իսկ խարխլում է բարեկամ երկրների սկզբունքը: Եղել են կոշտ զրույցներ, բայց առանձնազրույցներով, և դա հարթվել է, և նմանատիպ ցայտուն երևույթներ մեր իշխանության ժամանակ չեն եղել, և մենք որևէ մեկ անգամ չենք ունեցել մի դեպք, որ պարտվողական դիրքորոշում արձանագրված լիներ ՀԱՊԿ-ի հետ բանակցությունների ժամանակ»,-ասաց նա: Հարցին, թե հիմա կա՞ այդ պարտվողական դիրքորոշումը, նշեց, որ պետք է հետևել զարգացումներին:
Ի դեպ, Վահրամ Բաղդասարյանը կարծիք հայտնեց, որ դեկտեմբերի 6-ին կորոշեն, որ ՀԱՊԿ գլխավոր քարտուղար կմնա ՌԴ պաշտոնակատարը: