ՌԴ-ը պետք է հզորացնի երկրի բանակն ու նավատորմը՝ առանց սպառազինության համաշխարհային մրցավազքի մեջ ներքաշվելու. Պուտին
Ռուսաստանի Դաշնության նախագահ Վլադիմիր Պուտինը հայտարարել է, որ անհրաժեշտ է հզորացնել երկրի բանակն ու նավատորմը՝ առանց սպառազինության համաշխարհային մրցավազքի մեջ ներքաշվելու, գրում է РИА Новости գործակալությունը:
«Մենք տեսնում ենք, որ վերջին տարիներին մոլորակի վրա իրավիճակը, ցավոք, դեպի լավը չի գնացել: Որոշ տարածաշրջաններում այն նույնիսկ ավելի է վատթարացել: Այդպես օրինակ՝ Մերձավոր Արևելքում ու Աֆղանստանում իրավիճակը դեռ հեռու է կայունությունից, շատ հարցեր են դեռ մնում Կորեական թերակղզում տիրող իրավիճակի հետ կապված: Չնայած Մինսկում ձեռք բերված համաձայնություններին՝ չեն դադարում Ուկրաինայի հարավ-արևելքում զինված բախումները», - ասել է Պուտինը՝ շեշտելով, որ ՆԱՏՕ-ն տարեցտարի շարունակում է մեծացնել իր ռազմական ներուժը հենց Ռուսաստանի սահմանների մոտ:
Նրա խոսքով՝ նման պայմաններում Ռուսաստանը պարտավոր է ճկուն ու արդյունավետ քայլեր ձեռնարկել պոտենցիալ վտանգը չեզոքացնելու համար՝ միևնույն ժամանակ չներքաշվելով սպառազինության մրցավազքի մեջ:
«Եվ վերջին տարիների արդյունքները ցույց են տալիս, որ հենց այդպես էլ մենք սովորել ենք աշխատել», - հավելել է Պուտինը: