Թրամփը հայտնել է, թե իր կարծիքով ով է մեղավոր սաուդացի լրագրող Ջամալ Խաշոգջիի սպանության համար
ԱՄՆ նախագահ Դոնալդ Թրամփը կարծում է, որ սաուդացի ընդդիմադիր լրագրող Ջամալ Խաշոգջիի սպանության համար մեղավոր է աշխարհը, որը դաժան վայր է հանդիսանում:
Ինչպես փոխանցում է ТАСС գործակալությունը, նման կարծիք ամերիկացի առաջնորդը հայտնել է Ֆլորիդայի Mar-a-Lago կալվածքում հրավիրված ասուլիսում, որտեղ նա անցկացնում է Գոհաբանության օրը:
Թրամփին հարց է տրվել, թե ում է պետք պատասխանատվության ենթարկել Խաշոգջիի սպանության համար: «Գուցե պատասխանատվության է պետք ենթարկել աշխարհը, որը դաժան վայր է հանդիսանում: Աշխարհը շատ դաժան վայր է», - պատասխանել է ԱՄՆ ղեկավարը:
Հիշեցնենք, որ երեքշաբթի Թրամփը հայտարարել էր, որ Միացյալ Նահանգները շարունակում է լինել Սաուդյան Արաբիայի հուսալի գործընկերն անկախ Խաշոգջիի սպանության գործում առկա չբացահայտված հանգամանքներից: Ամերիկացի առաջնորդն ընդգծել է, որ մտադիր չէ լրագրողի սպանության պատճառով խզել հարաբերությունները Սաուդյան թագավորության հետ: