Նախարարներ, նախկին պատգամավորներ, հայտնի գործիչներ. ռեյտինգային ընտրակարգով Մալաթիա-Սեբաստիա և Շենգավիթ վարչական շրջաններում առաջադրված թեկնածուները
Արտահերթ խորհրդարանական ընտրություններին Երևանի Մալաթիա-Սեբաստիա և Շենգավիթ վարչական շրջաններն ընդգրկող 3-րդ ընտրատարածքում ռեյտինգային ընտրակարգով առաջադրված են ՀՀ կառավարության ներկայացուցիչներ, ներկա և նախկին պատգամավորներ, ակտիվիստներ: Հատկապես ներքին թեժ մրցակցություն է այստեղ սպասվում «Իմ քայլը» դաշինքում, որտեղ առաջադրվել է միայն 3 նախարարի պաշտոնակատար:
«Իմ քայլը» դաշինքից թիվ 3 ընտրատարածքում են առաջադրվել մասնավորապես Կառավարության առաջին փոխվարչապետի պաշտոնակատար Արարատ Միրզոյանը, ՀՀ կրթության և գիտության նախարարի պաշտոնակատար Արայիկ Հարությունյանը, բնապահպանության նախարարի պաշտոնակատար Էրիկ Գրիգորյանը, արտաքին գործերի նախարարի տեղակալ Ռուբեն Ռուբինյանը:
Այստեղ է նաև առաջադրված ԱԺ պատգամավոր Հրաչյա Հակոբյանը, ով Նիկոլ Փաշինյանի աներորդին է: Նույն դաշինքից այստեղ առաջադրվել են նաև «Ազատություն» ռադիոկայանի լրագրող Սիսակ Գաբրիելյանը, վարչապետի աշխատակազմի հանրային կապերի և տեղեկատվության կենտրոն, ՊՈԱԿ-ի տնօրենի 1-ին տեղակալ, նախկին լրագրող Արթուր Հովհաննիսյանը:
Հայաստանի Հանրապետական կուսակցությունից 3-րդ ընտրատարածքում առաջադրված են «Ռեֆորմիստների» կուսակցության նախագահ Վահան Բաբայանը, ՀՀ ԱԺ պատգամավոր, ՀՀԿ խորհրդի անդամ Արաիկ Հովհաննիսյանը:
«Բարգավաճ Հայաստան» կուսակցությունից առաջադրվել է ՀՀ ԱԺ պատգամավոր Հակոբ Նազարյանը:
«Լուսավոր Հայաստան» կուսակցության ցուցակով թիվ 3 ընտրատարածքում առաջադրվել է ՀՀ ԱԺ պատգամավոր Էդմոն Մարուքյանը: Նշենք, որ նախկին հերթական ընտրություններին նա առաջադրվել էր Լոռու մարզից: Այստեղ է նաև առաջադրվել «Սկիզբ» մեդիա կենտրոնի տնօրեն Արման Բաբաջանյանը:
«Մենք» դաշինքից առաջադրվածներից ցանկում է Սփյուռքի նախարարության Տեղեկատվական-վերլուծական ծրագրերի բաժնի մասնագետ Անուշ Լալայանը, ով հայտնի է հեղափոխության օրերին վարտիքով ճանապարհային տեսախցիկները փակելու դրվագով:
Հայ հեղափոխական դաշնակցությունից այս ընտրատարածքում առաջադրվել է ՀՀ աշխատանքի և սոցիալական հարցերի նախարարության վերլուծության և մոնիթորինգի վարչության մոնիթորինգի բաժնի պետի տեղակալ Արթուր Եղիազարյանը:
«Սասնա ծռեր» կուսակցությունից ռեյտինգային կարգով պատգամավորի թեկնածու է առաջադրվել տոնածառի գործով դատապարտված և ազատ արձակված Գևորգ Սաֆարյանը:
«Օրինաց երկիր» կուսակցությունից այս ընտրատարածքում ներկայացված է նախկին պատգամավոր, Եվրոպական Համալսարանի ռեկտոր Հեղինե Բիշարյանը: