Ճապոնուհի միայնակ մայրիկը 10 տարի շարունակ դերասանի է վարձել՝ դստեր հոր դերը կատարելու համար
Ճապոնուհի մայրիկը, որը միայնակ է մեծացնում իր դստերը, դերասանի է վարձել, որը 10 տարի շարունակ խաղացել է աղջկա հոր դերը:
Ինչպես ներկայացնում է Oddity central-ը, աղջկա ծնողները բաժանվել են, երբ նա դեռ շատ փոքր էր, որից հետո նրա հայրն անհետացել է իր կյանքից: Որոշ ժամանակ անց աղջիկն սկսել է հարցեր տալ հոր մասին, սակայն դպրոց հաճախելուց հետո իրավիճակն ավելի է բարդացել:
10 տարեկանում աղջիկն արդեն հարցեր չէր տալիս, սակայն մայրը նկատել էր, որ նա ինքնամփոփ է դարձել և չի ցանկանում դպրոց գնալ, որտեղ նրան անդադար ծաղրում էին հայր չունենալու պատճառով: Այդ պահին նա, տեղեկանալաով մարդկանց վարձելու հնարավորություն ընձեռող գործակալության մասին, որոշել է դերասանի վարձել, որը կխաղա աղջկա հոր դերը:
Ճապոնուհին դստերն ասել է, որ իր հայրը երկրորդ անգամ է ամուսնացել և այլ ընտանիք ունի, սակայն ցանկանում է իր հետ նույնպես հանդիպել: Պայմանավորվածության համաձայն՝ նրանք հանդիպում էին ամիսը երկու անգամ, միասին խնջույքների և ուղևորությունների մեկնում: Ամեն անգամ դերասանի ծառայություններից օգտվելիս ճապոնուհին 90 դոլար պետք է վճարեր:
Տասը տարի անց մայրը զգացել է, որ աղջկանից բացի ինքն էլ է կապվել վարձու «հայրիկի» հետ և նույնիսկ սիրահարվել է նրան, սակայն դերասանը մերժել է նրա զգացմունքները՝ նշելով, որ ինքն այդ դերը ստանձնել է գումարի համար:
Դերասանն ինքը խոստովանել է, որ թեև շարունակում է կատարել սիրող հայրիկի իր դերը, գնալով ամեն ինչ էլ ավելի է բարդանում: