Միջազգային կոալիցիայի ավիահարվածի հետևանքով 20 խաղաղ բնակիչ է զոհվել Դեր Զորում
ԱՄՆ գլխավորած միջազգային կոալիցիան հերթական ավիահարվածն է հասցրել Սիրիայի Դեր Զոր նահանգի Հաջին քաղաքի ուղղությամբ:
Ինչպես հաղորդում է РИА Новости-ն՝ մեջբերելով Սիրիայի պետական հեռուստատեսության տվյալները, ավիահարվածի թիրախ է դարձել շուկան, ինչի հետևանքով 20 խաղաղ բնակիչ է մահացել, նրանց թվում՝ 9 երեխա, ինչպես նաև 8 կին՝ մեկ ընտանիքից:
Կոալիցիան պարբերաբար ավիահարվածներ է հասցնում Հաջինի և Դեր Զորի մյուս մոտակա գյուղերի ուղղությամբ՝ իբրև աջակցելով «Սիրիայի ժողովրդավարական ուժեր» զորամիավորմանն «Իսլամական պետություն» ահաբեկչական խմբավորման դեմ պայքարում:
Սիրիական լրատվամիջոցները բազմիցս հաղորդել են խաղաղ բնակիչների շրջանում գրանցված զոհերի մասին:
Դամասկոսը ՄԱԿ-ին կոչ է արել միջոցներ ձեռնարկել և վերջ դնել երկրի տարածքում կոալիցիայի անօրինական գործողություններին: