Տնտեսվարողը չի պատժվում, եթե 5000 դրամանոց ապրանքը զեղչից մեկ օր առաջ 10,000 դրամ է սահմանում, հետո՝ զեղչում 50 տոկոսով. Բ. Պիպոյանը՝ հայկական «սև ուրբաթի» մասին
Հայաստանում խանութների կողմից զեղչեր հայտարարելու գործընթացի վերահսկողությունը անարդյունավետ է, երբ չկա զեղչերի մասին համապատասխան օրենք: Այս մասին Tert.am-ի հետ զրույցում ասաց «Իրազեկ և պաշտպանված սպառող» ՀԿ նախագահ Բաբկեն Պիպոյանը՝ խոսելով սպառողների դժգոհության մասին, որ նոյեմբերի 23-ին Հայաստանում անցկացված «սև ուրբաթն» այդքան էլ սև չէր:
«Մենք օրենքով չենք սահմանել, թե ինչ է զեղչը: Եթե չկա օրենք, որը սահմանում է զեղչը, տնտեսվարողը կաշկանդված չէ 5000 դրամանոց ապրանքը զեղչից մեկ օր առաջ թանկացնել 10.000-ով, հետո զեղչել այն 50 տոկոսով ու վաճառել 5000 դրամով: Տնտեսվարողը հանգիստ կարող է նման բաներ անել, սահմանել զեղչ՝ ցանկացած չափով, ցանկացած օր, ցանկացած կերպ՝ թանկացնելով, հետո զեղչի անվան տակ էժանացնելով: Սա խնդիր է, որը բխում է օրենսդրական բացից»,- մանրամասնեց Բաբկեն Պիպոյանը:
Նա ասաց, որ ցավոք, այս դեպքում սպառողին չեն էլ մոլորեցնում, որովհետև չկա սահմանում:
«Շատ կարևոր է սահմանել, թե երբ կարելի է գնի փոփոխությունը զեղչ դիտարկել, ոչ թե գնային փոփոխություն: Իսկ քանի չկա այս սահմանումը, տնտեսվարողը չի պատժվում, սանկցիաներ չենք կարող կիրառել նրա դեմ»,- ասաց Բաբկեն Պիպոյանը:
Ըստ Պիպոյանի՝ իրենք պատրաստվում են համապատասխան օրենսդրական փոփոխություններ կատարելու փաթեթ ներկայացնել կառավարությանը:
«Պետությունը շատ դեպքերում չի միջամտում՝ հույս ունենալով, որ ինքն իրեն կկարգավորվի ոլորտը: Մի շարք երկրներում կա օրենք, որտեղ ասվում է, որ տնտեսվարողը կարող է զեղչ սահմանել տոն օրերին, լիկվիդացիայի ժամանակ, երբ խանութը ռեբրեդինգ են անում: Չես կարող գինը իջեցնել միայն մարքեթինգի համար, բայց իրականում չզեղչել: Իսկ մեզ մոտ բիզնեսը ոչ մի օրենք չի խախտում, երբ ապրանք է բերում 100,000 դրամով, մի օր հետո վաճառում է 80 տոկոս զեղչով՝ 20,000-ով կամ էլ զեղչում է 100,000-անոց ապրանքը վաճառելով հենց 100,000-ով»,- ասաց նա՝ շեշտելով, որ նախորդ տարվա համեմատ այս տարի «սև ուրբաթն» ավելի լավ է անցել: