Ժամանակն է, որ մտնենք նոր տրամաբանության մեջ, որ կոչվում է 4-րդ արդյունաբերական հեղափոխություն. «Սասնա ծռերը»՝ Գյումրիում (տեսանյութ)
Բացի «Սասնա ծռերից», մյուս ուժերում դժվար է տեսնել թիմ: Դուք բացի Նիկոլ Փաշինյանից, ո՞ւմ գիտեք այդ թիմում: Դա պրոբլեմ է: Շատ կարևոր է, որ մենք թագավոր չընտրենք, այլ ընտրենք կուսակցություն, որ ունի գաղափարախոսություն:
Այս մասին Գյումրիում քարոզարշավի ժամանակ ասաց «Սասնա ծռեր» կուսակցության համամասնական ցուցակով առաջադրված թեկնածու Ստեփան Գրիգորյանը:
Պետրոս Մակեյանն էլ նշեց, որ վարչական ռեսուրս է կիրառվում, վախի հոգեբանությունը դեռ մնացել է, իսկ երեկ էլ լուրեր են ունեցել ընտրակաշառք բաժանելու մասին: «Սա կլինի մաքուր, արդար քվեարկություն, քան ընտրություն, քանի որ հեղափոխական էյֆորիան թույլ չի տալիս մարդկանց ընտրելու, մեծ մասն արդեն կողմնորոշված է դեպի Նիկոլ Փաշինյանը, մի մասին վրա էական ազդեցություն ունի ՀՀԿ-ն, իսկ նոր ուժերի մեջ մնում է մնացած 30-40 տոկոս ընտրազանգվածը հավաքելը»,-նկատեց նա:
Ցուցակը գլխավորող Վարուժան Ավետիսյանն էլ նշեց, որ ժամանակն է, որ գազի և էլեկտրաէներգիայի սակագների իրական արժեքը հաշվարկվի ու ներկայացվի հանրությանը, կատարվեն համապատասխան փոփոխություններ: «Ժամանակն է, որ հանքարդյունաբերությունը բերվի ազգային դաշտ, ժամանակն է նաև, որ մենք աշխարհի զարգացումներից հետ չմնանք, մտնենք նոր տրամաբանության մեջ, որ կոչվում է 4-րդ արդյունաբերական հեղափոխություն, մտնենք, հասցնենք, լինենք այդ շարքում, որ մենք կյանքից հետ չմնանք: Ժամանակն է, որ ստեղծենք պաշտոնական կազմակերպված ազգ-բանակ»,-ասաց նա: