Իրանը մտադիր է շարունակել հրթիռային փորձարկումները և չի պատրաստվում թույլտվություն խնդրել որևէ երկրից. իրանցի գեներալ
Իրանի զինված ուժերի ներկայացուցիչ, բրիգադային գեներալ Աբոլֆազլ Շեքարչին հայտարարել է, որ Իրանը կշարունակի իր հրթիռային փորձարկումները և դրա համար թույլտվություն չի խնդրի այլ երկրներից:
«Իրանի հրթիռների և պաշտպանական արտադրության այլ միջոցների փորձարկումները նախատեսված են պաշտպանության և զսպիչ նպատակների համար, ամեն ինչ կշարունակվի այնպես, ինչպես որ կա, և մենք կշարունակենք հրթիռների փորձարկումն ու մշակումը», - РИА Новости-ի փոխանցմամբ՝ ասել է Շեքարչին:
«Այս հարցը դուրս է գալիս բանակցությունների շրջանակներից և վերաբերում է մեր ազգային անվտանգությանը, և մենք թույլտվություն չենք խնդրի դրա համար և ոչ մի երկրից», - հավելել է իրանցի գեներալը:
Ավելի վաղ ԱՄՆ պետքարտուղար Մայք Պոմպեոն հայտարարել էր, որ Իրանը միջին հեռավորության բալիստիկ հրթիռ է փորձարկել՝ խախտելով ՄԱԿ-ի ԱԽ բանաձևերը: