Թուրքիայում քուրդ քաղաքական գործիչը դատապարտվել է 2 տարվա ազատազրկման
Թուրքիայում երկու տարվա ազատազրկման է դատապարտվել քրդամետ Ժողովրդադեմոկրատական կուսակցության անդամ, նախկին պատգամավոր Էրթուղրուլ Քյուրքչյուն, որին դատարանը մեղավոր է ճանաչել «ահաբեկչամետ քարոզչություն» իրականացնելու մասին հոդվածով:
Ինչպես փոխանցում է թուրքական diken.com.tr կայքը, քուրդ գործչին մեղադրանք էր առաջադրվել 2016 թվականին Իգդիրում Նովրուզի տոնակատարության ժամանակ «Քրդստանի աշխատավորական կուսակցություն» խմբավորմանն աջակցող կոչեր հնչեցնելուց հետո:
Հայտնի է, որ Քյուրքչյուն և իր փաստաբանները մտադիր են բողոքարկել կայացված վճիռը:
Նշվում է, որ այս քաղաքական գործչի վերաբերյալ նույն մեղադրանքով դեռևս առկա է երկու տարբեր դատական գործ, որոնց շրջանակներում վերջինիս սպառնում է 13-ից մինչև 33 տարվա ազատազրկում: