ՌԴ-ն տագնապալի վիճակում է, դրա համար ինտենսիվ հանդիպումներ են կազմակերպում. Պուտին-Փաշինյանը հանդիպմանը հաշվեկշռի որոնման գործընթաց է գնալու. Լ. Շիրինյան
Վարչապետի աշխատակազմի տեղեկատվության և հասարակայնության հետ կապերի վարչությունից հայտնեցին, որ վարչապետի պաշտոնակատար Նիկոլ Փաշինյանը դեկտեմբերի 27-ին աշխատանքային այցով կմեկնի Ռուսաստանի Դաշնություն՝ Մոսկվա, որտեղ նախատեսված է նրա հանդիպումը ՌԴ նախագահ Վլադիմիր Պուտինի հետ: Քննարկվելու են երկկողմ և բազմակողմ ձևաչափերում համագործակցությանը վերաբերող օրակարգային հարցեր:
Քաղաքագետ, «Քրիստոնեա-ժողովրդական վերածնունդ» կուսակցության նախագահ Լևոն Շիրինյանի կարծիքով՝ հանդիպման նպատակը կողմերի միջև հաշվեկշռի որոնումն է: Ըստ նրա՝ Ռուսաստանի հետ իրական հաշվեկշռի քաղաքականություն վարելու հնարավորություն է առաջացել:
«Չնայած Հայաստանից ոռնոց կա, իբր ՌԴ-ն ՀՀ-ի հանդեպ վստահություն չունի և այլն, խնդիրը դա չէ, իրենց համար չափազանց կարևոր է Հայաստանի հետ հարաբերությունների վատ վիճակում պահպանությունը: Ինձ թվում է, ռուսները մի քիչ տագնապալի վիճակում են, որովհետև իրենց ներքին և արտաքին քաղաքական իրավիճակն այնպիսին է, որ Հայաստանի հանկարծակի քայլերը կարող է ամբողջ համակարգը ոչնչացնել՝ նախկին դրվածքի իմաստով, դրա համար ինտենսիվ հանդիպումներ են կազմակերպում: Նոր իշխանություն է, բնականաբար, նաև շոշափելու, հասկանալու հարց ունեն, որպեսզի Հայաստանը մնա լոյալ դաշնակից, որովհետև Հայաստանը լոյալ դաշնակից չմնալու բոլոր հիմքերն ունի»,- նշեց քաղաքագետը:
Լ. Շիրինյանի խոսքով՝ հայ-ռուսական հարաբերությունների ամբողջ փաթեթը՝ սկսած 1997 թ.-ից, պետք է մանրակրկիտ վերանայման ենթարկվի և հավասարեցվի:
«Ինձ թվում է, այդ հարցերը գալիս են օրակարգ, թեև Ռուսաստանի չի ուզում: Եթե նոր իշխանություն է, ժողովրդի լեգիտիմությունը վայելող է, ուրեմն պետք է գործընկերներ լինենք: Եվ հայկական կողմն այդ գործը պետք է տանի, եթե նյարդերը պահած աշխատի, դրան հասնելու է: Պետք է լինենք գործընկերներ, բայց ոչ խոնարհ ծառաներ, ինչպես Սերժ Սարգսյանն ու Ռոբերտ Քոչարյանն էին»,- ասաց նա:
Քաղաքագետի կարծիքով՝ հանդիպմանը կքննարկվեն տնտեսական համագործակցության վերաբերող հարցեր, որի մեջ մտնում է նաև գազի սակագնի նոր պայմանագիրը: Բայց, նրա համոզմամբ՝ գազի հարցը այդքան կարևոր չէ, ինչպես ներկայացվում է, տնտեսական լայն համագործակցության հարցեր կան: Լևոն Շիրինյանը շատ կարևոր է համարում նաև ռազմատեխնիկական համագործակցության հարցի քննարկումը:
«Ռուսաստանը ոտքից գլուխ զինել է Ադրբեջանին, հավասարակշռությունը վերականգնելու խնդիր կա: Իր դաշնակից պետության դեմ հրահրել է պատերազմ Ադրբեջանի ձեռքով, դրանք սրբագրելու կարիք կա: Անվճար պետք է զենք տան, ամբողջ երկիրը տրամադրված է իրենց: Նախկին նախագահները ամբողջ երկիրը ենթարկել են Ռուսաստանի շահերին, դրա համար նա պետք է վճարի»,- նկատեց նա:
Ինչ վերաբերում է ՌԴ նախագահ Վլադիմիր Պուտինի մեծ ասուլիսին արված այն հայտարարությանը, որ ՀՀ-ն ոչ միայն տարածաշրջանի, այլև աշխարհում Ռուսաստանի դաշնակիցն է, Լևոն Շիրինյանը նշեց. «Պատկերացրեք ինչքան նեղ վիճակում է, որ նման հայտարարություն է անում: Այստեղ երկրորդ հարցը կա, իսկ գինը ո՞րն է: Հետևապես, պետք է հավասարակշռվեն տնտեսական, քաղաքական, ռազմատեխնիկական հարաբերությունները»: