Երևանի ավագանին տնտեսական հարաբերություններից չի հասկանում, փոխարենը լավ հասկանում է գործուղումներից. Վ. Բոստանջյանը` տուրքերի բարձրացման մասին
Նման որոշումները սխալ են, քանի որ նման որոշումներ հանպատրաստից չեն ընդունվում. Tert.am-ի հետ զրույցում նման տեսակետ հայտնեց տնտեսագետ Վարդան Բոստանջյանը՝ անդրադառնալով Երևանի քաղաքապետարանի՝ տուրքերը թանկացնելու որոշմանը:
«Բացարձակապես համակողմանի քննարկում, հիմնավորում, գնահատում չկա այդ որոշման հիմքում, էլ չեմ ասում այն, որ վարչապետի հայտարարությունների հետ հակադրությունների մեջ են մտնում: Վարչապետն ասում էր, որ որոշակի սոցիալական բիզնես իրականացնող սուբյեկտներին ընդհանրապես պետք է հարկերից հեռու պահել, մինչև ոտքի կանգնեն, բայց այս պարագայում ակնհայտորեն ավելացնում են ծանրաբեռնվածությունը այդ սուբյեկտների նկատմամբ, որոնք առանց այդ էլ չափազանց բարձր հարկային պայմաններում են աշխատում: Այդ գործունեության տեսակները ոչ այլ չինչ են, քան սոցիալական բիզնես»,-ասաց նա:
Նշենք, որ Երևան համայնքի ավագանին ընդունեց տեղական տուրքերի 2019 թ․ դրույքաչափերը սահմանելու նախագիծը, ըստ որի կբարձրացվեն մի շարք տուրքեր, որոնք 2018 թվականի սահմանված դրույքաչափերի նկատմամբ էական տարբերություն ունեն:
Ըստ նախագծի՝ տարեկան մինչև 58․3 մլն դրամ շրջանառություն ունեցող բիզնեսը Երևան համայնքում տեղական տուրքերը 2019 թ․ավելացված դրույքաչափերով չի վճարի:
Վարդան Բոստանջյանի խոսքով՝ պետք է տեսնել, թե զուգահեռ ինչ է տեղի ունենում, ինչն էլ հուշում է, թե այդ որոշումների տակ ոչ մի հիմնավորում չկա: «Տեսեք՝ փոխարենը գործուղումների գումարներն են ավելանում, ավելանում են հավելավճարները, պարգևատրումները, և խոշոր առումով իսկապես գտնվում ենք իրարամերժության մեջ: Ես ասում եմ, որ ցանկացած որոշում հատկապես հեղափոխությունից հետո զգույշ կատարեն, նախ հասարակության խնդիրները, հոգսերն առաջին հերթին հասկանալ է պետք, հետո նոր որոշում կայացնել»,-ասաց նա:
Տնտեսագետն անհիմն է համարում այն պնդումները, թե ժողովուրդն է որոշում: «Ինչքան կարելի է նման պատճառաբանություն բերել, ուզում եք խաբել ժողովրդին, հասկացանք, բայց չի կարող ժողովուրդն ամեն հարց լուծել, բա պետական կառույցներն ինչի՞ համար են: Պետք է կարողանան բոլոր խոցելի պահերը տեսնել և դժգոհությունները ոչ թե մեծացնել, շատացնել, այլ մեղմել դրանք: Որոշում են կայացնում՝ ձեռքի տակ չունենալով ոչ մոնիտորինգ, ոչ մի վիճակագրություն, արդյո՞ք փոքր ձեռնարկություններ են, մե՞ծ են, շրջանառությունը 58 մլն է, թե՞ ավելի է, այսինքն՝ դեռևս գույքագրում չարած երեկ նիստ եք անում, այսօր որոշում են»,-ասաց նա:
Բոստանջյանը նշեց, որ նիստին հետևելով տպավորություն է ստացել, որ ո՛չ խոշոր բիզնեսից է այս ավագանին հասկանում, ո՛չ փոքր, ո՛չ էլ միջին: «Ընդհանրապես տնտեսական հարաբերություններից, կարծես, չեն հասկանում, փոխարենը, կարծես, լավ հասկանում են գործուղումներից ու նշում, թե իբրև թե ներդրումներ բերեն: Դա էլ նոր բան է, կարծես ներդրումները հորդում են, և մարդ է պետք, որ գնա, շալակի, ներդրումները բերի: Պետք է հասկանալ չէ՞, որ ներդրումները հոսում են այնտեղ, որտեղ կան ընդգծված պայմաններ ներդրումների համար, այստեղ տնտեսական հարաբերությունները հո՞ լիրիկական խաղ չեն»,-ասաց նա: