Արվեստագետները լինում են կամ շատ ստորաքարշ, կամ ըմբոստ, և միությունները ԽՍՀՄ-ում ստեղծվել էին նրանց հետապնդելու համար. Հարություն Խաչատրյան
Կինեմատոգրաֆիստների միությունը և ընդհանրապես բոլոր միությունները պետք է վերափոխվեն և դառնան մշակութային կենտրոնների և պրոֆմիությունների համատեղում. hրավիրված ասուլիսին հայտարարեց Կինեմատոգրաֆիստների միության նախագահ Հարություն Խաչատրյանը՝ անդրադառնալով տարեկան գործունեությանը:
«Միությունների մասին բավական վատ կարծիք է մնացել Սովետական միության ժամանակներից, որովհետև սա եղել է КГБ-ի ստեղծած հիմնարկները, որոնք հիմնականում հետապնդում էին արվեստագետներին, որպեսզի խորհրդային քաղաքականությունից և կուրսից դուրս չգան, որովհետև արվեստագետների մեջ կային վտանգավոր մարդիկ. կամ լինում են շատ ստորաքարշ, կամ ըմբոստ, այնպես որ, անցել են այդ ժամանակները: Պետք է միությունները դարձնենք մշակութային կենտրոնների և պրոֆմիությունների համատեղում, մեջտեղը պետք է ընտրություն կատարենք, մեր նպատակն է լուրջ մշակութային կենտրոն դառնալ, որովհետև հին ձևով աշխատել ու խնդիրներ դնել մեր առջև, ծիծաղել են, բոլոր միություններն առաջվանը չեն և կյանքն առաջվանը չէ»,-ասաց նա:
Հարություն Խաչատրյանը նշեց, որ թոշակառու կինոարվեստագետներին օգնում են ֆինանսապես: Ըստ նրա՝ իրենց համար ամենակարևորն այն է, որ կինոմթնոլորտ ստեղծելն է, նաև կինոմատոգրաֆիստների իրավունքները պաշտպանելը:
«Ուզում ենք բոլոր պրոդյուսերների իրավունքները հավասար լինեն, դրսից եկածներն էլ նույն իրավունքներն ունենան»,-ասաց նա:
Հարություն Խաչատրյանը նշեց, որ «Ոսկե ծիրան» կինոփառատոնից անհատներ սկսել են նորից զբաղվել «Կինոյի մասին» օրենքով, որը կքննարկվի բոլոր կինոգետների հետ, նաև կինոկենտրոնների, միության հետ և դա կախված չի լինի այդ օրվա քաղաքականության հետ, այլ կլինի միջազգային լուրջ օրենք: «Մինչև տարեվերջ օրենքը կներկայացնենք քննարկման լայն շրջանակներին և ապա կներկայացվի խորհրդարանի ընդունմանը»,-ասաց նա:
Հարություն Խաչատրյանը նշեց, թե շատերն արհամարհական են վերաբերվում հայկական կինոյին, մինչդեռ հայկական կինոն եղել է լավագույններից մեկը: «Նույնիսկ նրանք, ովքեր ասում էին՝ վրացական կինոն փայլուն է, իհարկե փայլուն էր, և հայկական կինոյի համար ասում էին՝ շատ դանդաղ կինո է, բայց պարզվեց՝ ժամանակի մեջ դարձավ ոճ, մտածողություն ու փիլիսոփայություն՝ հայ արվեստագետների կողմից արված: Այն ժամանակ գուցե չէին ընկալում, հիմա նաև միջազգային հանրությունն է բարձր գնահատում, երբ ցուցադրում ենք նաև համր կինո, հասկանում են, որ լուրջ, միջազգային մակարդակի կինո է ստեղծվել»,-ասաց նա: