Ինչպե՞ս կրճատել աղբի քանակը. կամավորները գտել են լուծումը

Մինչ մենք շարունակ դժգոհում ենք քաղաքի այս կամ այն հատվածում կուտակված աղբի մնացորդներից, Հռիփսիմեն շտապում է հերթական բնակչին փոխանցել վերամշակված գունավոր տոպրակներն ու բացատրել՝ ինչպես տեսակավորել թղթի, ապակու և պլաստիկի թափոնները:

Կամավոր երիտասարդներից բաղկացած խումբը բնակիչների օգնությամբ հավաքում է նշված թափոններն ու հանձնում վերամշակման։

Գաղափարի հեղինակը Հռիփսիմեն է, պատմում է՝ ամեն ինչ սկսվեց նրանից, որ չէր կարողանում թուղթը որպես աղբ տեսնել աղբամանում։

Քայլ առ քայլ ընդլայնեցին իրենց գործունեությունը, այսինքն բնակիչների օգնությամբ հավաքում են և վերամշակման հանձնում թուղթը, պլաստիկը, ապակին։

Նախաձեռնության նպատակը հստակ է՝ մեր երկրում հնարավորինս կրճատել աղբի քանակը հենց  վերամշակման միջոցով:

Իսկ թափոնների վերամշակումից արդեն արտադրվում են ամենօրյա օգտագործման կենցաղային իրեր՝  կախիչներից մինչև  ծաղկամաններ, գոգաթիակներ ու  դույլեր:

Աննան «Էկո աղբ» նախաձեռնության կամավորներից է, ասում է՝ դեռ մանկուց չէր կարողանում թափթփված տեսնել իր շրջապատը։

Տարբեր օրեր քաղաքի տարբեր հատվածներում մարդկանց հետ պայմանավորվելով՝ երիտասարդները հավաքում են թափոնները, տեսակավորում և հանձնում վերամշակող ընկերություններին, ովքեր մեծ ուրախությամբ ընդունում են դրանք։

Հազարից ավելի ընտանիք արդեն միացել է նախաձեռնությանը, երիտասարդները կառավարությունից արձագանք դեռ չեն ստացել, ամեն ինչ ինքնուրույն են անում, բայց համոզված են՝ այս մշակույթը զարգացնելու պարագայում հնարավոր կլինի երկիրը աղբից մաքրել:

The post Ինչպե՞ս կրճատել աղբի քանակը. կամավորները գտել են լուծումը appeared first on ԳԱԼԱ.