Անդրանիկ Քոչարյանը 10 օր առաջ իմ ընկերոջ միջոցով հորդորում էր, որ փախչեմ ՀՀ-ից, քանի որ Նիկոլը հրամայել է բռնել ինձ. այս երկիրն այնքան եմ սիրում, որ փախչելու տեղ չունեմ, թող ձերբակալեն. Ռ. Հայրապետյան

Ազգային ժողովի «Իմ քայլը» խմբակցության պատգամավոր, իմ նախկին ընկեր Անդրանիկ Քոչարյանը 10 օր առաջ հորդորում էր իմ ընկերներից մեկի միջոցով, որ ես փախնեմ Հայաստանից, որովհետև Նիկոլը հրաման է տվել՝ ինձ բռնեն: Այս մասին «Պրեսսինգ» հաղորդման ժամանակ ասաց Ֆուտբոլի ֆեդերացիայի նախկին նախագահ, ԱԺ նախկին պատգամավոր Ռուբեն Հայրապետյանը՝ անդրադառնալով ոստիկանության 6-րդ վարչության կողմից իր տունը խուզարկելու դեպքին:

Ռուբեն Հայրապետյանը նախ պատմեց, թե երբ են սկսել իրավապահները հետաքրքրվել իրենով. «Ես երկրում չէի, մոտ մեկ ամիս առաջ էր, երբ ինձ ասացին, որ ֆեդերացիայից ինչ-որ փաստաթղթեր են ուզում, իմ ֆեդերացիայի նախագահ եղած ժամանակ շինարարական գործունեության վերաբերյալ»,- ասաց նա՝ վստահեցնելով, որ դրան նայում է շատ նորմալ:

«Թող ստուգեն, բայց վեցերորդ վարչությունը չունի այդ հնարավորությունը, որ շինարարական այդպիսի ծավալների վերաբերյալ ինֆորմացիան կարողանա այդքան կարճ ժամանակահատվածում ստուգել. ոչ միայն ստուգել, այլ նաև ինչ-որ յուրացման թիվ հայտնաբերել, այդ հայտնաբերումից հետո դատավորի կարգավիճակ ընդունել և պարզել, որ ես հափշտակել եմ: Միգուցե պարզվի, որ այդպիսի թիվ չկա, իրականում հափշտակություն իմ կողմից երբեք էլ չի եղել: Ես չեմ բացառում, որ կարող է սխալներ եղած լինեն, բայց այն թվերը, որոնք իրենք հայտարարում են, ուղղակի ծիծաղելի է»,- ընդգծեց նա:

Իսկ թե ինչ թվերի մասին է խոսքը, Հայրապետյանն ասաց, որ տարբեր թվեր են նշում, կես միլիոնից, մեկ միլիարդ, հստակ բան չգիտի: Հայրապետյանը կարծիք հայտնեց, որ հնարավոր է՝ գործի քննությունը տարուց ավել տևի, որովհետև իսկապես ծավալը մեծ է. «Դրանից հետևությունն այն է, որ շատ վերևից հրամանը ստացել են. արագ Ռուբեն Հայրապետյանին չեզոքացնենք, քանի որ ամսի 23-ին ֆեդերացիայի նախագահի ընտրությունն է»,- ասաց նա:

Հարցին, թե ինչպես են իրավապահները ներխուժել իրենց տուն, Հայրապետյանն ասաց, որ շատ կոռեկտ, օրենքի տառը պահելով: «Ինչպես կասեր մեր ժամանակների դասականը՝ ակուռատնի, բայց չներխուժեցին, եկան մեր բնակարան: Որևէ վատ բան չեմ կարող ասել նրանց կամ նրանց գործողությունների մասին, շինարարական աշխատանքների հետ կապված փաստաթղթեր են փնտրել»,- ասաց նա:

Հարցին՝ ի վերջո ի՞նչ գտան, նա պատասխանեց՝ առգրավել են մի քանի փաստաթղթեր, սեփականության վկայականներ. «Ճիշտն ասած՝ ինձ չի էլ հետաքրքրել՝ ինչ են առգրավում, տղայիս հետ անում էին: Ես ասել եմ՝ ինչ ուզում եք, տարեք, ես ոչ մի մտահոգություն չունեմ, մտել, նայել են, ինչ գտել են՝ նպատակահարմար է, վերցրել, գնացել են: Ես էդ տանկերը կատակով եմ ասել, ցանկալի կլիներ ունենայի, որ նվիրեի բանակին»,- շեշտեց նա:

Դիտարկմանը, թե այն անձանցից շատերը, ում նկատմամբ իրավապահ մարմիններն ինչ-որ գործողություններ են արել, լքել են Հայաստանը, և այդ կապակցությամբ ԱԺ «Իմ քայլը» խմբակցության պատգամավոր Անդրանիկ Քոչարյանը Աժ ամբիոնից կոչով հանդես եկավ՝ ասելով՝  եկեք տուն, Հայրապետյանը պատասխանեց. «Այ էդ նույն Անդրանիկ Քոչարյանը, որը իմ նախկին ընկերն է եղել, 10 օր առաջ հորդորում էր իմ ընկերներից մեկի միջոցով, որ ես փախնեմ Հայաստանից, որովհետև Նիկոլը հրաման է տվել՝ ինձ բռնեն: Նույն Անդրանիկ Քոչարյանն է ասել: Ասել է, որ  քրեական գործ է հարուցված վրաս, ու ինձ ձերբակալում են»:

Հայրապետյանը նշեց, որ դա ասում են, որ թողնես գնաս. «Դրանից հետո միանգամից «մասկի շոուն» կանեին, որ տեսեք, Ռուբեն Հայրապետյանը հանցագործ է, թալանել է ֆեդերացիան, ու փախավ: Ես այս երկիրն էնքան եմ սիրում՝ փախնելու որևէ տեղ չունեմ: Ավելին եմ ասում՝ ձերբակալում են, թող ձերբակալեն: Կոչ եմ անում ոստիկանության աշխատողներին, թող չտանջվեն, էդքան մարդ հանեն, աշխատանքից կտրեն, զանգեն ինձ, երբ զանգեն, ասեն՝ ուզում ենք քեզ ձերբակալենք, արի, ազնվորեն եմ ասում՝  հինգ րոպե հետո կրկնակի արագությամբ կհասնեմ այնտեղ, թող ձերբակալեն: Ձերբակալելով՝ մեր տեսակին չեն կարա վախեցնեն»,- ընդգծեց նա:

Մանրամասները` տեսանյութում: