«Սոլեյմանիի սպանությունը սրացման նոր փուլի է տանում». Լավրով և Զարիֆ
Ռուսաստանի և Իրանի արտգործնախարարներ Սերգեյ Լավրովն ու Մոհամադ Ջավադ Զարիֆը հեռախոսազրույց են ունեցել, որի ժամանակ ընդգծել են, որ Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանությունը տարածաշրջանում լարվածության սրման նոր փուլի է տանում: Այս մասին տեղեկացնում է РИА Новости-ն՝ հղում անելով ՌԴ արտգործնախարարությանը:
«Նախարարներն ընդգծել են, որ ԱՄՆ-ի գործողությունները միջազգային իրավունքի հիմնարար նորմերի կոպիտ խախտում են և չեն նպաստում Մերձավոր Արևելքում առկա բարդ խնդիրների լուծմանը, այլ տանում են լարվածության սրման նոր փուլի»,-ասված է ՌԴ արտգործնախարարության հրապարակած հաղորդագրության մեջ:
Ինչպես ավելի վաղ տեղեկացրել էր Tert.am-ը, Բաղդադում սպանվել է Իրանի իսլամական հեղափոխության պահապանների կորպուսի գեներալ Ղասեմ Սոլեյմանին: Գեներալի սպանությունից հետո, Իրանի ԱԳՆ է կանչվել Շվեյցարիայի դեսպան Մարկուս Լեյթները, որը ներկայացնում է ԱՄՆ շահերը Թեհրանում:
Հաղորդվում է նաև, որ ԱՄՆ Զինված ուժերը բարձր մարտունակության են բերվել իրանցի գեներալի սպանությունից հետո:
Իրանի գերագույն հոգևոր առաջնորդ այաթոլլահ Ալի Խամենեին խոստացել է վրեժ լուծել Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանության համար: