«Հուսով ենք` կհաջողվի լարվածությունը թուլացնել». Արցախի ԱԳՆ-ն իր մտահոգությունն է հայտնել Բաղդադում տեղի ունեցած իրադարձությունների վերաբերյալ
Պաշտոնական Ստեփանակերտն իր մտահոգությունն է հայտնել վերջերս մերձավորարևելյան տարածաշրջանում տիրող իրավիճակի, մասնավորապես՝ Բաղդադում տեղի ունեցած իրադարձությունների վերաբերյալ։
«Հուսով ենք` կհաջողվի լարվածությունը թուլացնել և իրավիճակը կարգավորել բացառապես խաղաղ միջոցներով՝ ապահովելով տարածաշրջանային կայունությունն ու անվտանգությունը»,- ասվում է Արցախի ԱԳՆ տարածած հաղորդագրության մեջ։
Նշվում է, որ Արցախի ԱԳՆ֊ն հետևում է իրադրությանը և մշտական կապի մեջ է Հայաստանի Հանրապետության գործընկեր կառույցների հետ։
Ինչպես ավելի վաղ հայտնել էր Tert.am-ը, Բաղդադում ԱՄՆ-ի ավիահարվածից սպանվել է Իրանի իսլամական հեղափոխության պահապանների կորպուսի գեներալ Ղասեմ Սոլեյմանին: Գեներալի սպանությունից հետո, Իրանի ԱԳՆ է կանչվել Շվեյցարիայի դեսպան Մարկուս Լեյթները, որը ներկայացնում է ԱՄՆ շահերը Թեհրանում:
Հաղորդվում է նաև, որ ԱՄՆ Զինված ուժերը բարձր մարտունակության են բերվել իրանցի գեներալի սպանությունից հետո: