Լավրովին խոստացել են «ջերմ» ընդունելության արժանացնել Վրաստանում
ՌԴ արտգործնախարար Սերգեյ Լավրովի հնարավոր այցը Վրաստան զայրույթի ալիք է բարձրացրել վրաց հասարակության շրջանում: Այս մասին գրում է «Коммерсантъ» պարբերականը:
Մայիսին Թբիլիսիում տեղի է ունենալու Եվրոպայի խորհրդի նախարարների հանդիպումը, որին պետք է մասնակցի նաև ՌԴ արտգործնախարարը: Վրաց ընդդիմադիրները խոստացել են, որ նրան կդիմավորեն զանգվածային ցույցերով և կոչ կանեն իշխանություններին Լավրովի դեմ կիրառել «օկուպացիայի մասին» օրենքը:
Մասնավորապես, «Միացյալ ազգային շարժում» խմբակցության պատգամավոր Ռոման Գոցիրիձեն «ջերմ» ընդունելությամբ է սպառնացել Լավրովին: Բացի այդ, նա անպատասխանատու է համարել իշխող «Վրացական երազանք» կուսակցության քայլը, որով նրանք համաձայնեցրել էին անցյալ տարի ռուս քաղաքական գործիչների այցը Վրաստան:
Միևնույն ժամանակ, խորհրդարանի փոխխոսնակ, «Վրացական երազանք»-ի անդամ Գեորգի Վոլսկին հայտարարել է, որ պետությունը կկատարի իր բոլոր պարտավորությունները Եվրոպայի խորհրդի նկատմամբ: Իր հերթին, Եվրոպայի խորհրդի քարտուղարությունը երաշխիքներ է պահանջել Վրաստանից, որ նախարարների հանդիպման ժամանակ ոչ մի «չնախատեսված հանգամանք և անսպասելի իրավիճակ» Թբիլիսիում չի լինի:
Եվրոպայի խորհրդի նախագահությունը Վրաստանին է անցել 2019 թվականի նոյեմբերին: Նախագահությունն այս կառույցում տևում է 6 ամիս: