«Սպառնալիքներով արատավորված ձեռքերն ու լեզուներն իրավունք չունեն պղծել պարսկերենը». Իրանի ԱԳՆ-ն քննադատել է Թրամփին` ֆարսիով գրառում անելու համար
Իրանի արտաքին գործերի նախարարության մամուլի խոսնակ Աբաս Մուսավին, մեկնաբանելով ԱՄՆ նախագահ Դոնալդ Թրամփի՝ ֆարսիով արած թվիթերյան գրառումը, նշել է, որ «նա իրավունք չուներ պղծել հնամենի պարսկերեն լեզուն»:
«Դուք իսկապե՞ս կանգնած եք իրանցի ժողովրդի կողքին, որի հերոսին սպանեցիք, թե՞ նրանց դեմ եք»,- Մուսավիի խոսքը մեջբերում է en.irna.ir կայքը:
Խոսնակն ընդգծել է, որ «սպառնալիքներով արատավորված ձեռքերն ու լեզուներն իրավունք չունեն պղծել պարսկերենը»:
Ավելի վաղ Միացյալ Նահանգների նախագահ Դոնալդ Թրամփն Իրանի հետ հարաբերությունների սրման ֆոնին իր պաշտոնական թվիթերյան էջում պարսկերեն գրառում էր արել՝ դիմելով իրանցիներին:
«Դիմում եմ Իրանի քաջ և տառապյալ ժողովրդին, նախագահությանս սկզբից ես ձեր կողքին եմ եղել, և իմ վարչակազմը կշարունակի ձեր կողքին մնալ: Մենք ուշադիր հետևում ենք ձեր ցույցերին, և ոգեշնչված ենք ձեր խիզախությամբ: Իրանի կառավարությունը պետք է իրավապաշտպան խմբերին թույլ տա հետևել և փաստեր փոխանցել իրանցի ժողովրդի կազմակերպած ցույցերի վերաբերյալ: Խաղաղ ցուցարարների ևս մի սպանդ կամ ինտերնետ կապի անջատում չի կարող լինել: Աշխարհը հետևում է»,-գրել էր նախագահը:
Թրամփն իր էջում նաև տեղադրել էր պարսկերեն գրառման անգլերեն տարբերակը:
Հիշեցնենք, որ անցած հանգստյան օրերին Թեհրանում հակակառավարական ցույցեր են սկսվել. ցուցարարները պահանջում են երկրի գերագույն հոգևոր առաջնորդ այաթոլլահ Ալի Խամենեիի հրաժարականը: Իրանցիների պահանջը պայմանավորված է հունվարի 8-ին տեղի ունեցած ավիավթարով, որի հետևանքով 176 մարդ է զոհվել:
Իրանի իշխանությունները խոստովանել են, որ «Ուկրաինական ավիաուղիներին» պատկանող ինքնաթիռը սխալմամբ խոցվել է իրանական հրթիռով:
دولت ایران باید به گروههای حقوق بشر اجازه بدهد حقیقت کنونی اعتراضات در جریان مردم ایران را نظارت کرده و گزارش بدهند. نباید شاهد کشتار دوباره ی معترضان مسالمت آمیز و یا قطع اینترنت باشیم. جهان نظاره گر این اتفاقات است.
— Donald J. Trump (@realDonaldTrump) January 11, 2020