Գրոզնիում հայրը «նույնասեռականության ջինին» արտաքսելու համար մահակով ծեծել է աղջկան ու Ղուրան կարդացել նրա համար
Չեչնիայի մայրաքաղաք Գրոզնիի 22-ամյա բնակչուհի Ամինաթ Լորսանովայի հայրը բազմիցս ծեծի է ենթարկել ոչ ավանդական սեռական կողմնորոշում ունեցող դստերն ու Ղուրան կարդացել նրա համար` նրա միջից «ջինին» հանելու համար: Համապատասխան բողոքով աղջիկը ներկայացել է ՌԴ Քննչական կոմիտե, հայտնում է news-r.ru կայքը:
Ըստ Լորսանովայի` 2018-ին նրան երկու անգամ անօրինական կերպով տեղափոխել են հոգեբուժարաններ, որտեղ աղջիկը, իբր, խոշտանգումների ու կտտանքների է ենթարկվել:
«Բուժման» ընթացքում մի քանի անգամ աղջկա հայրը «մահակով վտարել է ջինին», ինչպես նաև կապել է ոտքերը, ժապավենով փակել բերանը և հանգստացնող ներարկումներ արել:
«Եթե անձի պահվածքը չի համապատասխանում Չեչնիայում համընդհանուր քարոզչությամբ ձևավորված նեո-ավանդական բարոյականությանը, ապա հայտարարվում է, որ ջիներն են տիրում այդպիսի մարդուն: Չեչնիայում ջիների արտաքսմանը հասնում են ոչ միայն այլընտրանքային բժշկության, այլ նաև քվազի բժշկական կենտրոնների միջոցով»,- հայտնել է Ռուսաստանի ԼԳԲՏ ցանցի ներկայացուցիչ Վերոնիկա Լապինան:
Պորտալի տվյալների համաձայն` Լորսանովան Չեչնիայից հեռացել է 2019 թվականի ապրիլին: Վերջինս պահանջում է, որ քրեական գործ հարուցվի: