«Գնալով ավելի դժվար է դառնում խորհրդարանական ընդդիմությանը չկատոկելը», «Ընդդիմությունն իրավունք ունի ունենալ այլ կարծիք». «Իմ քայլը»-«Բարգավաճ Հայաստան» վեճը շարունակվեց հայտարարությունների ժամին
Ազգային ժողովում այսօր թեժ էր, նախ վիճաբանություն էր տեղի ունեցել ԲՀԿ խմբակցության և «Իմ քայլը» խմբակցության պատգամավորների միջև քրեական ենթամշակույթի դեմ պայքարի օրենքի քննարկման ժամանակ, սակայն վեճը դրանով չավարտվեց:
Վիճաբանությունը տեղափոխվեց ԱԺ հայտարարությունների ժամ, սակայն այս անգամ քաշքշոցի չհասավ: Նախ իշխանական խմբակցության պատգամավորը քննադատեց ԲՀԿ-ին, մասնավորապես այն հայտարարության համար, որն արեց պատգամավոր Գևորգ Պետրոսյանը՝ նշելով, որ գողականի հետ էլի երեք տառից բաղկացած հասկացություն կա, լավ կլինի նաև դրա դեմ պայքարել:
«Իմ քայլը» խմբակցության պատգամավոր Տիգրան Ուլիխանյանն իր հայտարարությունը վերնագրել էր հետևյալ կերպ՝ «Խորհրդարանական ընդդիմությունը վտանգավոր է առողջ ընդդիմության կայացման համար»: Պատգամավորն ընդգծեց, որ այսօր երկու կարևոր՝ քրեական ենթամշակույթի մասին օրենքի և բանկային գաղտնիքի մասին օրենքի քննարկումները վերածվեցին չգիտես, թե ինչի: «Մենք դեռ ոմանց պետք է բացատրենք, որ երբ ասում ենք ԱԺ բարձրագույն ամբիոն, ամբիոնի աշխարհագրական դիրքը նկատի չունենք: Ցավով եմ նշում, քաղաքական մեծամասնությունն անելիք ունի նաև ընդդիմության կայացման հարցում: Ես խիզախություն կդրսևորեմ և կհայտարարեմ, որ խորհրդարանական ընդդիմությունը քրեական տարրերին ուղղակի և անուղղակի, գիտակցված և ակամա աջակցում է իր գործողություններով»,- ասաց նա:
Ըստ նրա՝ այսօր էլ քրեական ենթամշակույթը ներկայացված է խորհրդարանում, բայց ոչ «Իմ քայլ»-ում. «Խորհրդարանական ընդդիմությունն ամեն օր փորձում է իրեն գցել մեր քաղաքական կատոկի տակ: Գնալով ավելի դժվար է դառնում նրանց չկատոկելը, բայց մենք չենք հանձնվելու, չենք տրվելու նրանց կատոկելու գայթակղությանը»,- ասաց նա:
Թեմայի շուրջ ելույթով հանդես եկան նաև իշխող ուժի այլ պատգամավորներ, դրանցից ուշագրավ էր նաև Արփինե Դավոյանի հայտարարությունը: Նա նշեց, որ երկու նախագծերը ԲՀԿ կողմից ընդունվել են սվիններով, այստեղ այդ քննարկումները վերածվել են քաղաքակրթական և արժեհամակարգային բախման:
«Այսօր հերթական անգամ բախման հերթական դերակատարը դարձավ ԲՀԿ-ական պատգամավոր Գևորգ Պետրոսյանը, որին միացան ԲՀԿ մյուս ինտելեկտուալ պատգամավորները և ի ցույց դրեցին քրեական ենթամշակույթին հարիր իրենց գիտելիքները ողջ խտությամբ: Դահլիճում նույնիսկ հնչեցին հայհոյանքներ: Այս ամենից հետո Գևորգ Պետրոսյանը հաղթական կեցվածքով լրագրողներին ասել է, որ ինքը վատ բան չի արել և ոչ մեկ թող իր վրա չվերցներ այդ ասածները: Սրանից էլ կարող ենք ենթադրություն անել, որ վաղն էլ ձեր խմբակցության ղեկավար Գագիկ Ծառուկյանը կարող է գալ ԱԺ և ասել՝ ես Գևորգ Պետրոսյանի ցավը տանեմ, կամ Արթուր Դալլաքյանին էլ հետը, չգիտեմ»,- հայտարարեց Դավոյանը:
«Իմ քայլը» խմբակցության պատգամավորների ելույթներից հետո չուշացավ ԲՀԿ-ական պատգամավորների արձագանքը:
Նախ Նաիրա Զոհրաբյանը իմքայլական պատգամավոր Արփի Դավոյանին հորդորեց՝ ԲՀԿ առաջնորդ Գագիկ Ծառուկյանի փոխարեն չորոշել՝ ինչ խոսի: «Տիկի՛ն Դավոյան, մի որոշեք պարոն Ծառուկյանի փոխարեն, թե այս կամ այն հարցին ինչպես պետք է պատասխանի Գագիկ Ծառուկյանը։ Խոսում եք քաղաքակիրթ լեքսիկոնից, և այս ամբիոնից ասում եք՝ կատոկեցինք ընդդիմությանը, մեր կատոկի տակ ընկան, եթե սա ձեր քաղաքական բառապաշարն է, եթե սա ձեր քաղաքական բնամթերքն է, շնորհավորում եմ, այդ բնամթերքին դուք լիարժեք տիրապետում եք»,-ասաց Զոհրաբյանը։
Այնուհետև ԲՀԿ-ական պատգամավոր Սերգեյ Բագրատյանն իր հայտարարությունն արեց այս թեմայի վերաբերյալ: Նա ասաց, որ «կատոկի» վերաբերյալ արտահայտությունը Դավոյանը չի ասել, այլ Տիգրան Ուլիխանյանը: «Բայց հարցը դա չէ, ես ուզում եմ ասել, որ հարցը երևույթն է: Պարո՛ն Ուլիխանյան, Դուք տղամարդ եք և Ձեզ չի սազում, որ սպառնում եք կատոկի տակ թողնել, փոս փորողը ինքն է փոսն ընկնում, եղբայր: Պետք չէ նման բառապաշարով ընդդիմության հետ խոսել»,- ասաց նա:
Բագրատյանն այնուհետև նշեց, որ գործընկերոջ՝ Գևորգ Պետրոսյանի հայտարարությունը կարող էր լիներ դասականի բանաստեղծության օրինակով՝ «Դու հասարակ մի դերանուն, երկու տառ»: «Ինչո՞ւ չեք մտածում, որ դա դասական ստեղծագործության օրինակով էր: Տիկին Դավոյան, Դուք կին եք, ինչո՞ւ այդպես չեք մտածում, այլ դրա տակ տեսնում եք աշխարհացունց արտահայտություններ»,- ասաց նա:
Բագրատյանի այս հայտարարությանն էլ արձագանքեց ԱԺ փոխխոսնակ Ալեն Սիմոնյանը. «Գևորգ Պետրոսյանը ստեղծագործել է «Սևակ» կեղծանվան տակ, տեսա՞ք՝ ինչ իմացանք»:
Այս հարցին անդրադարձավ նաև ԲՀԿ-ական պատգամավոր Արման Աբովյանը: Նա զարմանք հայտնեց, թե ինչո՞ւ Պետրոսյանի հայտարարությունն ամբողջությամբ չի հասկացվել: «Զարմանում եմ ուղղակի, որ այս կողմը չի լսել շատ հետաքրքիր մի նախադասություն՝ պայքարում ենք կրիմինալ ենթամշակույթի դեմ և կոչ անում պայքարել այլ արատավոր երևույթների դեմ. չեք լսել, չէ՞: Սենց մի հատ կայք կա, «յութուբ» է անունը, մտեք, մի հատ նայեք էլի: Ես շատ լավ հասկանում եմ, որ խաղ է գնում ու փորձում եք այդ թեման «քցեք մեր ջեբը»»,- ասաց պատգամավորը:
Նա նշեց, որ ոչ ոք կրիմինալը չի պաշտպանել, չի պաշտպանում ու չի էլ պաշտպանելու, միակ խնդիրն այն է, որ այս օրինագիծը չի լուծելու այդ հարցերը: «Դա մեր կարծիքն է: Պարոն Ուլիխանյան, գաղտնիք բացեմ, ընդդիմությունն իրավունք ունի ունենալ այլ կարծիք, պա՞րզ է, և դա առողջ ընդդիմության նշան է, պա՞րզ է»,- ասաց նա: