Հայաստանում քաղաքական կոռուպցիան չի վերացել, սակայն դրա դեմ պայքարի արդյունավետությունը չի կարելի չափել նախկինների դեմ հարուցված քրգործերի քանակով. Վարուժան Հոկտանյան (տեսանյութ)
Կոռուպցիայի դեմ պայքարի ոլորտում որակական առաջընթացի մասին խոսելը դեռևս վաղ է, թեև որոշակի քանակական առաջընթաց կա: «Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել «Թրանսփարենսի ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը:
«Մենք դեռևս ունենք կոռուպցիայի հիմնախնդիրը: Դրա դեմ պայքարում որոշակի առաջընթացը պայմանավորված է քաղաքական կամքի արտահայտմամբ: Բայց հնարավոր չէ միանշանակ պնդում անել Հայաստանում համակարգային կոռուպցիայի առկայության կամ բացակայության մասին: Հիմքեր չունեմ պնդելու, որ այսօր Հայաստանում կա համակարգային կոռուպցիա, բայց ոչ էլ կարող եմ պնդել, որ այն արդեն վերացել է»,- ասել է Հոկտանյանը:
Ըստ փորձագետի՝ պետք է հասկանալ՝ ձերբակալվող որոշ պաշտոնյաներ, օրինակ՝ փոխնախարարներ, եղել են կոռուպցիոն շղթայի մա՞ս, թե՞ գործել են անհատապես:
Հոկտանյանի կարծիքով՝ երկրի աշխարհաքաղաքական կողմնորոշումը կապ չունի կոռուպցիայի դեմ պայքարի տեմպերի հետ, ավելին՝ երկիրը կարող է լինել ավտորիտար ասիական երկիր, բայց կոռուպցիայից ավելի մաքուր, քան, օրինակ, Եվրամիության արևելաեվրոպական երկրները. «Աշխարհաքաղաքական կողմնորոշումը կարող է ընդամենը նախադրյալներ ստեղծել: Բայց դրանց կյանքի կոչումը շատ բանով կախված է այդ երկրի իշխանությունների քաղաքական կամքից»:
Հոկտանյանի պնդմամբ՝ կոռուպցիայի դեմ պայքարի արդյունավետությունը կախված է ինստիտուտների կայացվածությունից. «Կոռուպցիան, մանավանդ համակարգային կոռուպցիան, առկա է, եթե ինստիտուտները կայացած չեն: Առաջանում է երկու զուգահեռ իրականություն՝ ֆորմալ և ոչ ֆորմալ ինստիտուտներ: Միայն ինստիտուտներ ստեղծելով էլ, իհարկե, հնարավոր չէ կոռուպցիայի դեմ պայքարել, չի կարելի թերագնահատել նաև երկրի վերնախավի անձնային որակների դերը»:
Վարուժան Հոկտանյանի բնորոշմամբ՝ այսօր Հայաստանում քաղաքական կոռուպցիան չի վերացել, այն շարունակվում է: «Քաղաքական կոռուպցիայի դրսևորման լրջագույն փորձությունը կլինեն հաջորդ ընտրությունները: Պետք է հասկանալ՝ քաղաքական կոռուպցիայի ծավալների միտումն ինչպիսի՞ն է, դա տարածվո՞ւմ է, թե՞ սահմանափակվում»,- ասել է փորձագետը:
Վարուժան Հոկտանյանի կարծիքով՝ կոռուպցիայի դեմ պայքարի արդյունավետությունը չի կարելի չափել բացառապես նախկին իշխանության բարձրաստիճան պաշտոնյաների դեմ հարուցված քրեական գործերի քանակով. «Միայն պատժիչ քայլերը խնդրի լուծում չեն: Ոչ միայն նախկին, այլև ներկա իշխանավորների անպատժելիությունը պետք է վերանա, չպետք է լինի անպատժելի կոռուպցիոներ»,- ամփոփել է հակակոռուպցիոն ոլորտի փորձագետը:
Դավիթ Սարգսյան