Սահմանադրական կարգի պահպանման մասին միջազգային հեղինակավոր կառույցից ՀՀ-ի իշխանությանն արված հորդորները կոշտ, սթափեցնող ու մտահոգիչ են. Վ. Մարտիրոսյանը՝ Դեմոկրատների միջազգային միության բանաձևի մասին
Կառավարման ոչ պրոֆեսիոնալիզմով, երևույթների թերընկալմամբ, հատկապես՝ պետական կառավարման լրջությունը, կարևորությունը, ինչպես նաև՝ պատասխանատվությունը ընկալելու առումով այսօրվա իշխանությունն ունի խնդիր, իսկ ավտորիտար կառավարումը մեծ պրոֆեսիոնալիզմ և ուղղահայաց կառավարում է պահանջում ամբողջ պետական համակարգում: Այս մասին Tert.am-ի հետ զրույցում ասաց «Մեկ Հայաստան» կուսակցության քաղխորհրդի անդամ Վլադիմիր Մարտիրոսյանը` անդրադառնալով Կենտրոնամետ դեմոկրատների միջազգային միության (CDI) Գործադիր կոմիտեի՝ Հայաստանում քաղաքական իրավիճակի վերաբերյալ բանաձևին:
Նշենք, որ Կենտրոնամետ դեմոկրատների միջազգային միությունը անդրադարձ է կատարել Հայաստանում ժողովրդավարության խնդիրներին, մամուլի ազատությանը, դատական համակարգի քաղաքականացվածությանը և Սահմանադրական դատարանի նախագահ Հրայր Թովմասյանի հանդեպ իրականացվող ճնշումներին՝ նախազգուշացնելով Հայաստանի կառավարությանը դեպի ավտորիտարիզմի ճանապարհ անցնելու մասին:
Մարտիրոսյանի խոսքով՝ վերջին շուրջ մեկուկես տարում բոլոր իրադարձություններին, որոնք կատարվում են Հայաստանում, շատ ուշադիր հետևում են նաև արտերկրում, և վերջիններս անդրադառնում են իշխանության կողմից հարուցվող բոլոր այն խնդիրներին, որոնք այդ ամբողջ ընթացքում բարձրաձայնվել են Հայաստանում գործող արտախորհրդարանական ուժերի կողմից:
«Միջազգային բավականին հեղինակավոր կառույցի կողմից հնչում են հատկապես ավտորիտար ճանապարհ անցնելու մասին մտահոգություններ, դա որակում է, որը կարելի է համարել ոչ միայն քաղաքական, այլև որոշակի առումով քաղաքագիտական և մասնագիտական, որովհետև իշխանության թևերի տարանջատման, իշխանության մի թևի՝ մյուսի նկատմամբ գերակայություն սահմանելու տենդենցները նույնպես ունեն ավտորիտար բնույթի ենթատեքստ»,-նշեց Մարտիրոսյանը՝ նշելով, որ այդ կառույցից ՀՀ-ի իշխանությանն արված հորդորները կոշտ, սթափեցնող ու մտահոգիչ են:
Անդրադառնալով Կենտրոնամետ դեմոկրատների միջազգային միության՝ ՍԴ նախագահ Հրայր Թովմասյանի դեմ ճնշումներին և հարուցված քրեական գործի կապակցությամբ հայտնած մտահոգություններին և սահմանադրական կարգի և օրենքի գերակայության երաշխավորման կարևորությանը՝ Մարտիրոսյանն ասաց, թե ՍԴ-ի շուրջ ընթացող՝ «իրավական» ներկայացվող, բայց ամբողջությամբ քաղաքական թնջուկն արդեն շատ երկար կենսագրություն ունի:
«Մենք կարող ենք խոսել շուրջ մեկ տարվա մասին, որի ընթացքում սահմանադրական կարգի պահպանման մասին հորդորները եղել են ոչ միայն ներսից, այլև՝ դրսից: Պետք է հասկանալ, թե այս թնջուկն ու իշխանության կոշտ դիրքորոշումն այս առումով ինչքան կձգվեն: Ես չեմ կարծում, որ երկար կյանք կունենան: Իշխանությունը փորձում է այլ մեթոդաբանություն կիրառել՝ ճնշման, ՍԴ դատավորների՝ վաղ կենսաթոշակի անցնելու օրենքի միջոցով»,-ասաց Մարիտիրոսյանը:
Անդրադառնալով Կենտրոնամետ դեմոկրատների միջազգային միության կողմից Հայաստանի սահմանադրական կարգի շրջանակներում լայն և համապարփակ քաղաքական երկխոսության և ներառական քաղաքական միջավայրի կարևորության ընդգծմանը՝ Մարտիրոսյանը նշեց, թե այս իշխանությունը քաղաքական երկխոսության կարիք չունի, քանի որ իշխանությունն իր «սևսպիտակիզմի» ու բաժանման մեջ է գտնում իր լեգիտիմությունը: «Իշխանությունը չունի այնպիսի օրակարգ, որով համերաշխությունը, հասարակական խնդիրների քննարկումը կմիավորի երկու բևեռներում գտնվող այսօրվա հասարակությանը: Չմոռանանք, որ իշխանությունը ձևավորվել է հենց բևեռացման ֆորմուլայի օգտագործմամբ, երբ կային թշնամիներ, «սևեր», «սպիտակներ», և ամեն ինչ շատ պարզ էր»,-ասաց Մարտիրոսյանը:
Վերջինիս խոսքով, սակայն, անգամ ավտորիտարիզմի հասնելու համար այս իշխանությունը երկար ճանապարհ ունի անցնելու, քանի որ կառավարման համակարգում քաոտիկ վիճակ է տիրում, իսկ ավտորիտար կառավարումը ենթադրում է կենտրոնաձիգ, համակարգված կառավարում:
«Կառավարման ոչ պրոֆեսիոնալիզմով, երևույթների թերընկալմամբ, հատկապես՝ պետական կառավարման լրջությունը, կարևորությունը, ինչպես նաև՝ պատասխանատվությունը ընկալելու առումով այսօրվա իշխանությունն ունի խնդիր, իսկ ավտորիտար կառավարումը մեծ պրոֆեսիոնալիզմ և ուղղահայաց կառավարում է պահանջում ամբողջ պետական համակարգում: Մենք այսօր տեսնում ենք, որ պետական համակարգը ոչ միայն թերանում է իր կառավարման մեջ, այլև չի էլ կառավարում. ինքնահոս թողած վիճակը բավականին ակնառու է»,-պարզաբանեց նա: