Ղազախստանի և Ղրղզստանի սահմանին տեղի ունեցած զանգվածային ծեծկռտուքից հետո արտակարգ դրություն է հայտարարվել. կա 8 զոհ. տուժել է 137 մարդ
Ղազախստանի Կորդայ շրջանում, որը սահմանակցում է Ղրղզստանին, արտակարգ դրություն է հայտարարվել վերջերս այնտեղ տեղի ունեցած զանգվածային ծեծկռտուքից հետո, ինչի հետևանքով 8 մարդ էր մահացել, հաղորդում է Tengrinews.kz-ն:
Life.ru-ի փոխանցմամբ՝ տարածված հայտարարությունում նշվում է, որ տեխնոգեն բնույթի արտակարգ դրություն է հայտարարվել փետրվարի 8-ի ժամը 21:00-ից (երևանյան ժամանակով՝ 19:00):
Ժամբիլի մարզի ղեկավար Ասքար Միրզախմետովը արտակարգ դրությունը վերացնելու համար պատասխանատու է նշանակել իր տեղակալին և հանձնարարել համալիր միջոցատումներ իրականացնել տեղի ունեցածի հետևանքները կանխելու համար: Նշվում է, որ դեպքից հետո բժշկական օգնություն ստանալու համար բուժհաստատություններ է դիմել 137 մարդ: Իսկ ընդհանուր առմամբ անկարգություններին մասնակցել էր մոտ 1000 մարդ:
Հիշեցնենք, որ փետրվարի 7-ին Ղազախստանի հարավային շրջանում՝ Ղրղզստանի հետ սահմանին, ազգամիջյան զանգվածային ծեծկռտուք էր տեղի ունեցել: Ոստիկանությունը բերման էր ենթարկել ծեծկռտուքի 47 առաջնորդների, նրանք զինաթափ են արվել: Համաձայն երկրի ՆԳՆ տվյալների՝ տեղի ունեցածի հետևանքով զոհվել է 8 մարդ, ևս 40-ը՝ տուժել: Բացի դա, հաստատվել է 30 մասնավոր տների, 15 առևտրային օբյեկտների և 23 մեքենայի վնասման դեպքեր: