Մեկ տարուց ավել է՝ իշխանություն են, բայց չկարողանալով զգալի ձեռքբերումներ գրանցել որևէ ոլորտում, դեռ ընդդիմություն են խաղում նախորդ իշխանություններին. Գևորգ Գորգիսյան
«Լուսավոր Հայաստան» խմբակցության պատգամավոր Գևորգ Գորգիսյանը ֆեյսբուքյան էջում գրառում է կատարել` անդրադառնալով «Իմ քայլը» խմբակցության պատգամավոր Սիփան Փաշինյանի ավելի վաղ կատարած գրառմանը, որը նշել էր, թե ամաչում է այն փաստից, որ ժամանակին իր թիմակիցներն են եղել որոշ մարդիկ, այդ թվում` Գորգիսյանը:
«Լուսավոր Հայաստան» խմբակցության պատգամավորի խոսքով` մեկ տարուց ավել իշխանության եկած մարդիկ դեռևս ընդդիմություն են «խաղում»: Գորգիսյանի գրառումը ներկայացնում ենք ստորև.
«Երբ միայն բարեկամական կապերի շնորհիվ պատգամավոր դարձած անձը, այդպես էլ չի դառնում քաղաքական գործիչ, չի սովորում ճիշտ գրել նույնիսկ գործընկերների ազգանունները, բայց վստահորեն սկսում է ատելության քարոզ, թերևս չհասկանալով` ինչպես և ինչու է տեղի ունեցել հեղափոխությունը։ Հիմա դե արի ու էս մարդկանց հատ հատ բացատրի, թե ինչ է բազմակարծությունը, քաղաքական բազմազանությունը, քաղաքական բանավեճը և քաղաքական երկխոսության մշակույթը։
Մեկ տարուց ավել է, իշխանություն են, բայց չկարողանալով զգալի ձեռքբերումներ գրանցել որևէ ոլորտում, դեռ ընդդիմություն են խաղում նախորդ իշխանություններին։ Ու քանի որ իրենց պատկերացրած քաղաքական դաշտում կարող է լինել միայն մեկ ընդդիմություն, բոլոր նրանք, ովքեր իրենց հետ համաձայն չեն, ուրեմն անպայման նախկինների կողմից են։
Միասին անցած ճանապարհի համար անկեղծ ամաչելուց առաջ լավ կլիներ հիշել, թե ինչպես Վանաձորում մեծ աղմուկով տապալվելուց հետո եկաք մեր դուռը՝ դաշինք կազմելու խնդրանքով։ Հարգելիներս, ձեզ 73% ձայն են տվել, որ առաջ շարժվեք ու երկիրն էլ առաջ տանենք, ոչ թե անվերջ շոուներով կռիվ տաք անցյալի ուրվականների դեմ»,- գրել է նա։
Ավելի վաղ Սիփան Փաշինյանը գրել էր, որ հեղափոխության օրերին Էդմոն Մարուքյանը, Մանե Թանդիլյանը, Գևորգ Գորգիսյանը հնարավոր տարբեր լրատվամիջոցներով հարցազրույցներ էին տալիս` փորձելով ստվեր գցել հեղափոխության վրա և նույնն անում են հիմա` ՍԴ-ի հետ կապված: «Ես ամաչում եմ, որ ես մի թիմում եմ գտնվել ձեր հետ, ասում եմ անկեղծորեն: Խոսքս չի վերաբերում ամբողջ Լուսավոր Հայաստանի անդամներին»:
Լուսանկարը Գևորգ Գորգիսյանի ֆեյսբուքյան էջից: