Հայաստանը Էլդորադո չէ, որտեղ ամեն ինչ կատարյալ է. Ռուբեն Վարդանյանը մեկնաբանել է տարբեր երկրներում գործարար աշխարհի համար առկա ներդրումային ռիսկերը (տեսանյութ)
Հայտնի գործարար, բարերար, «Ավրորա» մարդասիրական նախաձեռնության և մոսկովյան «Սկոլկովո» կառավարման դպրոցի հիմնադիր Ռուբեն Վարդանյանը հյուրընկալվել է ռուսական RTVi հեռուստաալիքի "На троих" հաղորդմանը:
Մեկնաբանելով ներդրումային խնդիրները տարբեր երկրներում՝ գործարարն ընդգծել է, որ աշխարհի այս կամ այն երկիր ունի ինչպես առավելություններ, այնպես էլ ռիսկեր ներդրումների և գործարար աշխարհի համար: Նրա խոսքով՝ այդ ռիսկերը կարող են դրսևորվել տարբեր խոչընդոտների տեսքով:
«Օրինակ, Չինաստանում պարտադրում են, որ վերահսկիչ փաթեթը չինական ընկերության ձեռքում լինի, եկամուտը ցածր է, իսկ Սաուդյան Արաբիայում կարող են սպանել լրագրողին, և ոչինչ տեղի չի ունենա»,- ընդգծել է գործարարը՝ որպես մեկ այլ օրինակ մատնանշելով Հայաստանը, որը երկար տարիներ անկախություն չի ունեցել:
«Երբ ի հայտ եկավ անկախ հայկական պետությունը, մեծ թվով մարդիկ սփյուռքից սկսեցին երազել Հայաստանի մասին և հիասթափվեցին: Նրանք ասում էին. «Դա ահավոր է: Հայաստանում կոռուպցիա է: Հայաստանում այդ խնդիրներն են»: Իսկ ես ասում եմ. «Սպասեք, իսկ դուք որտեղի՞ց եք եկել: Այսինքն՝ Ամերիկայում դուք նորմա՞լ եք վերաբերում կոռուպցիային և կարծում եք, որ Հայաստանում պետք է ամեն ինչ կատարյա՞լ լինի: Այն պե՞տք է Էլդորադո լինի, որտեղ ամեն ինչ կատարյալ է: Կարծում եմ, որ մենք ապրում ենք փոխկապակցված աշխարհում, որտեղ շատ են տարատեսակ խնդիրները»,- մեկնաբանել է Վարդանյանը: