ՀՀ-ում ֆորս մաժոր է, որի համար ո՛չ գործատուն է մեղավոր , ո՛չ աշխատողը, սակայն եթե գործատուն չկարողանա վճարել աշխատողին, ապա պետությունը որոշակի պարտավորվածություն ունի. Սեդրակ Ասատրյան (տեսանյութ)
«Կոնցերն-Դիալոգ» փաստաբանական գրասենյակի ղեկավար, Հանրապետական հանձնաժողովի անդամ Գործատուների միության կողմից Սեդրակ Ասատրյանը Tert.am-ի հետ զրույցում անդրադարձավ ՀՀ-ում արտակարգ դրության պայմաններում աշխատանքի իրավունքին և այլ հարցերի:
Ըստ Ասատրյանի՝ Հայաստանում արտակարգ դրության հետ կապված բոլորը՝ գործատուն, աշխատողը, պետությունը պետք է գիտակցեն, որ վատ դրության մեջ են հայտնվել և համախմբված պետք է դուրս գալ այդ դրությունից:
Ինչ վերաբերում է գործատուներին ուղղված պահանջներին, Սեդրակ Ասատրյանն ասաց.«Մատ թափ տալով, թե գործատուները մեր ստրուկներն են, կամ մեր ճորտերն են, դա ուղիղ ճանապարհ է այդ ընկերությունները քանդելու»:
Հարցին, թե ինչ պետք է անի քաղաքացին, երբ գործատուն պահանջում է, որ նա ներկայանա աշխատանքի, պետությունը հորդորում է մեկուսանալ ու պահպանել որոշակի կանոններ կորոնավիրուսով չվարակվելու համար, բացի այդ էլ սոցիալական խնդիրներն են լուծումներ պահանջում, Սեդրակ Ասատրյանն ասաց, որ կարևորն անվտանգություն է.«Եթե վտանգ կա առողջությանը, ապա պիտի մնա տանը և մեկուսանա, հնարավորություն կա որոշ դեպքերում աշխատանքն անել հեռավար ձևաչափով»:
Ինչ վերաբերում է հարկադիր պարապուրդին, Սեդրակ Ասատրյանն ասաց.«Հարկադիր պարապուրդ է, երբ գործատուն չի կարողանում ապահովել աշխատողի աշխատանքը, այդ դեպքում պարտավոր է վճարել աշխատավարձի 2/3-րդ մասով: Իրավական տեսանկյունից հիմա հարկադիր պարապուրդի մասին խոսք լինել չի կարող, սա ավելի շատ ֆորս մաժոր է, որի դեպքում ո՛չ գործատուն է մեղավոր, ո՛չ աշխատողը: Դա նշանակում է, որ եթե մենք գնահատում ենք անձին, ապա բնականաբար, եթե վտանգ կա, մարդը պիտի ինքնամեկուսանա, իսկ այս դեպքում պետությունը պետք է համապատասխան վարքագիծ դրսևորի, վճարի, եթե ունի հնարավորություն, իսկ այն գործատուները, օրինակ՝ սպասարկման ոլորտի գործատուն, որտեղի՞ց վճարի, եթե ինքն էլ չի աշխատում, այ այս դեպքում պետությունը պետք է փոխհատուցի աշխատողին»:
Սեդրակ Ասատրյանն ասաց, որ ցավոք, երբ Կառավարությունում՝ և՛ նախկինում, և՛ հիմա, քննարկվում է Աշխատանքային օրենսգրքի բարելավման հարցը, մարդիկ չեն ընկալում, որ աշխատանքային օրենսդրությունը աշխատանքային օրենսգիրքը չէ միայն: Օրինակ՝ օրենսդրությունը չի կարգավորում կարանտինում գտնվող անձին վճարելու հարցը: «Նախագիծ ենք ստացել, որի մասին կարծիքի համար մեկ օր են սահմանել և այդ կերպ ուզում են հեռավար աշխատանքը կարգավորել, որը 98 հոդվածով կարգավորված է»,-ասաց Ասատրյանը:
Առավել մանրամասն՝ տեսանյութում: