ԱՄՆ-ի կողմից Արցախին ուղղված աջակցության չեղարկումը մտահոգիչ է, բայց շատ չենք ընկճվում, ականազերծման աշխատանքները կիրականացնենք պետության հաշվին. Արզիկ Մխիթարյան
Միացյալ Նահանգների կառավարությունը չեղարկել է Արցախում ականազերծման համար տրամադրվող ֆինանսական աջակցության մասին որոշումը: Tert.am-ը Արցախի Ազգային ժողովի արտաքին հարաբերությունների հանձնաժողովի նախագահ Արզիկ Մխիթարյանից հետաքրքրվեց՝ ի՞նչ կարծիք ունեն դրա վերաբերյալ: Ըստ նրա՝ աջակցության չեղարկումն իրենց համար մտահոգիչ է, ոչ հաճելի փաստ, բայց շատ չեն ընկճվում: «Մենք ականազերծման աշխատանքները կիրականացնենք պետության հաշվին»,- ասում է նա:
-Տիկին Մխիթարյան, ԱՄՆ կառավարությունը չեղարկել է Արցախին ուղղված ֆինանսական աջակցությունը: Ինչպե՞ս է դա ընկալվում Արցախում:
-Տարիներ առաջ 1990-ականների երկրորդ կեսին, երբ կանգնեցվեց Ադրբեջանին տրվող ռազմական օգնությունը, մենք ականատես եղանք նրան, որ ամերիկացի սենատորները հասել էին այն արդյունքին, որ մեծ ուշադրություն կար Արցախյան հիմնախնդրի նկատմամբ: Նրանք կարողանում էին արտահայտել Ադրբեջանի նկատմամբ իրենց բացասական դիրքորոշումը:
Այսօր իրավիճակը փոքր-ինչ փոխվել է, որովհետև Ադրբեջանը համառորեն իր քաղաքական կուրսն է առաջ տանում, ապատեղեկատվություն տարածում: Նրանք արդեն անցել են իրենց խավիարային քաղաքականությանը: Այդ իսկ պատճառով անակնկալ չէր Ամերիկայի կառավարության նման որոշումը:
Այսօր Արցախի նախագահի թեկնածուներից ոմանք արդեն հանձն են առել, որ այն ֆինանսական աջակցությունը, որ ԱՄՆ-ը տրամադրում էր Արցախում ականազերծում իրականացնելու համար, իրենց ընտրվելու դեպքում, կառավարությունը բյուջեի հաշվին կիրականացնի: Այնպես որ արցախցիներն այս հարցում էլ կդիմակայեն:
-Բայց ասվում է, որ այստեղ հարցը ֆինանսական աջակցությունը չէ, այլ ԱՄՆ-ի պես գերտերության, ԵԱՀԿ Մինսկի խումբը համանախագահող երկրի կողմից: քաղաքական աջակցությունը: Այդ աջակցությունը ինչ-որ առումով ընկալվո՞ւմ էր որպես ԱՄՆ-ի կողմից Արցախը ճանաչելու փաստ:
-Այո՛, իհարկե: Բավական հաճելի փաստ էր, որ ԱՄՆ-ը նման աջակցություն էր ցուցաբերում և նման կերպ` ոչ պաշտոնապես, բայց ինչ-որ առումով ճանաչում էին Արցախը:
Այսօր այդ աջակցության չեղարկումը մեզ համար, իհարկե, մտահոգիչ է, ոչ հաճելի փաստ: Բայց մենք շատ չենք էլ ընկճվում: Մենք ականազերծման աշխատանքները կիրականացնենք պետության հաշվին:
-Ձեզ մոտ տպավորություն չի՞ ստեղծվում, որ Միացյալ Նահանգները նաև կողմնակալ քաղաքականություն է վարում Ղարաբաղյան հիմնախնդրի պարագայում:
-Այսօր նորություն չեն գերտերությունների խաղերը, որոնք հիմնված են իրենց շահերի վրա: Զարմանալի չէ, որ նրանք այդ սկզբունքով են առաջնորդվում նաև Արցախի պարագայում: Իհարկե, Ադրբեջանն իրենից որոշակի հետաքրքրություն ներկայացնում է նրանց համար:
-Ամերիկահայ համայնքը պայքարում էր որոշումն ընդունելու դեմ: Հայկական կողմը՝ Հայաստանը, Արցախը այս հարցում բացթողումներ չունե՞ն:
-Մենք կարող ենք որոնել պատճառներ, կարող ենք գտնել մեղավորներ, ասել, որ հայկական դիվանագիտությունը ոչինչ չարեց: Իհարկե, ամենահեշտը դա անելն է, ասել, որ հայկական դիվանագիտության մեղավորությամբ է, որ ունենք նման արդյունք: Միշտ այդպես է, մենք մեզ անկարող ենք համարում նման հարցերում, կարծում ենք, թե չենք կարող գտնել իրավիճակի լուծումը:
-ԱՄՆ-ում կան հայամետ կոնգրեսականներ, որոնք դիմել են կառավարությանը, որ Արցախին տրվող ֆինանսական աջակցության չեղարկման մասին որոշումը վերացվի: Դուք ի՞նչ լուծում եք տեսնում այս իրավիճակում:
-Այո, ԱՄՆ-ում կան շատ բարյացկամ տրամադրված կոնգրեսականներ, որոնք աշխատում են ի նպաստ մեզ: Հուսանք, որ Արցախի նոր իշխանություններն էլ այս ուղղությամբ կաշխատեն: Իհարկե, ես հակված չեմ գուշակություններ անելու, բայց այնուամենայնիվ, այս ոլորտում մենք պետք է համառորեն գործենք:
Ինչպես նկատում ենք՝ Խոջալուի դեպքերը Ադրբեջանը մատուցում է որպես ցեղասպանություն: Աչք է փակում դրա վրա առաջադեմ հանրությունը: Ադրբեջանն աշխատում է, և զուր չէ ասված, որ հարյուր անգամ ասված սուտը վեր է ածվում ճշմարտության: Մենք ևս պետք է կարողանանք մեր թեզն առաջ տանել:
Հռիփսիմե Հովհաննիսյան