Աշխարհում կորոնավիրուսի մասին վերջին թարմացումները՝ ուղիղ հեռարձակմամբ
Կորոնավիրուսի վարակի աշխարհագրությունն անընդհատ փոփոխվում է՝ ընդգրկելով նորանոր պետություններ ու բնակավայրեր։ Վիրուսից վարակված մարդկանց թիվն աշխարհում ամեն րոպե փոփոխվում է։ Որոշ երկրներում վիրուսով նորանոր վարակակիրներ են բացահայտվում, ավելանում են մահացությունների դեպքերը, քիչ չեն նաև վիրուսը հաղթահարած մարդիկ։ Tert.am-ը ներկայացնում է կորոնավիրուսի մասին վերջին թարմացումները՝ ուղիղ հեռարձակմամբ և տեքստային թարմացումներով:
---------------------------------------------------------------------------------------------------------------------------
01:44
Իսպանիայում խստացվել են կարանտինի պայմանները. РИА Новости
Իսպանիայի կառավարությունը որոշել է խստացնել կարանտինի պայմանները: Այն ընկերությունների աշխատակիցները, որոնք կենսական անհրաժեշտության աշխատանքներ չեն կատարում, երկու շաբաթ պետք է մնան տանը: Այս մասին հայտնել է Իսպանիայի վարչապետ Պեդրո Սանչեսը: Փոխանցում է РИА Новости-ն:
«Կառավարությունը նախարարների արտակարգ իրավիճակների խորհրդում որոշում կկայացնի տանը թողնել բոլոր այն մարդկանց, որոնց աշխատանքը կենսական անհրաժեշտություն չունի: Մարտի 30-ից ապրիլի 9-ը նրանց տեղաշարժը ևս կսահմանափակվի, սակայն նրանք կստանան այդ երկու շաբաթվա աշխատավարձը»,- ասել է Սանչեսը:
Նա հավելել է, որ Իսպանիայում այժմ բարդ ժամանակաշրջան է և եթե կարողանան հիմա սահմանափակել մարդկանց տեղաշարժը, կկարողանան հաղթահարել վարակը: Կորոնավիրուսի հետևանքով մահացության մակարդակով Իսպանիան երկրորդ տեղում է: Այս ամբողջ ընթացքում մահացել է 5820 մարդ: Վարակված է ավելի քան 72 000 մարդ: Մահացության ցուցանիշով առաջին տեղում Իտալիան է:
00:40
«Фармзащита» գիտա-արտադրական կենտրոնը ներկայացրել է կորոնավիրուսի վարակի բուժման դեղամիջոց. Ռուսաստանի կենսաբժշկական դաշնային գործակալություն
Ռուսաստանի կենսաբժշկական դաշնային գործակալության «Фармзащита» գիտա-արտադրական կենտրոնը, հաշվի առնելով չինական և ֆրանսիական փորձը, մշակել է կորոնավիրուսային վարակի համար բուժման սխեմա՝ գործածելով մալարիայի բուժման «մեֆլոխին» դեղամիջոցը: Այս մասին հայտնում է Ռուսաստանի կենսաբժշկական դաշնային գործակալության պաշտոնական կայքը:
«Բարձր ընտրողականությամբ դեղն արգելափակում է կորոնավիրուսի ցիտոպաթիկ ազդեցությունը բջջային մշակույթում և կանխում է դրա վերարտադրումը, իսկ մեֆլոխինի իմունային ճնշող ազդեցությունը կանխում է վիրուսի հետևանքով առաջացած բորբոքային ակտիվացումը»,- ասել է Ռուսաստանի կենսաբժշկական դաշնային գործակալության ղեկավար Վերոնիկա Սկվորցովան:
Նշվում է, որ դեղամիջոցի մշակումն իրականացվել է՝ հաշվի առնելով Առողջապահության համաշխարհային կազմակերպության առաջարկությունները, ինչպես նաև Ռուսաստանի Դաշնության առողջապահության նախարարության մեթոդական հանձնարարականները՝ նոր կորոնավիրուսային վարակի կանխարգելման, ախտորոշման և բուժման վերաբերյալ: