ՀՀ Գեղարքունիքի մարզում կա կորոնավիրուսի վարակի հաստատված 10 դեպք, իսկ ՀՀ Լոռու մարզում՝ 12 դեպք. Գեղարքունիքի և Լոռու մարզպետներն անդրադարձել են համավարակի ցուցանիշներին
ՀՀ Գեղարքունիցի մարզպետ Գնել Սանոսյանը ֆեյսբուքյան գրառմամբ տեղեկացրել է, որ մարզում կորոնավիրուսով վարակվածության արդեն 10 դեպք է գրանցվել.
«Գեղարքունիքի մարզի հարգելի' բնակիչներ.
Ցավով պետք է նշեմ, որ մարզում կորոնավիրուսով վարակվածության արդեն 10 դեպք է գրանցվել։ Շփման շրջանակը հաջորդականությամբ պարզվում է և մեր քաղաքացիները կամ ինքնամեկուսանում են, կամ տեղափոխվում համապատասխան հաստատություններ՝ ըստ բժշկական ցուցումների։
Խնդրում եմ խստագույնս պահպանել պարետատան ցուցումները և հետևել միայն պաշտոնական լրահոսին։
Առողջ եղե՛ք»։
ՀՀ Լոռու մարզպետ Անդրեյ Ղուկասյանն էլ գրել է, որ այսօրվա դրությամբ Լոռիում հաստատվել է կորոնավիրուսով վարակվածության 12 դեպք, որից 2-ը նոր դեպքեր են: Նրանցից 7-ն արդեն առողջացել ու վերադարձել են տուն, 5-ը շարունակում են ստացիոնար բուժում ստանալ:
Հիշեցնենք, որ այսօրվա դրությամբ ՀՀ-ում կորոնավիրուսով ընդհանուր գրանցված դեպքերի թիվը 1291 է, վերջին 24 ժամում գրանցվել է կորոնավիրուսով վարակվելու 43 նոր դեպք: