Կորոնավիրուսի վարակման դեպքեր են հաստատվել Շիրակի մարզի Ջրափի և Շիրակավան համայնքներում, վարակի աղբյուրը Մարալիկից է
Կորոնավիրուսի վարակման դեպքեր են գրանցվել Շիրակի մարզի Ջրափի և Շիրակավան համայնքներում: Վարակի սկզբնաղբյուրը Մարալիկ քաղաքից է: Այս մասին Tert.am-ը տեղեկացավ համայնքի ղեկավար Կամո Սարգսյանից:
«Վարակակիրը Մարալիկի ԱԻՆ-ի աշխատող է: Դեպքը հաստատվելուց հետո նրան և ընտանիքին Գյումրի ինֆեկցիոն հիվանդանոց են տարել, բայց նույն օրը նրան տեղափոխել են Ծաղկաձոր, իսկ ընտանիքին տեղափոխել են Գյումրու հյուրանոցներից մեկը: Ընտանիքի անդամները թեստավորվել են, իրենց մոտ պատասխանը բացասական է եղել, արդեն մեկ շաբաթ է հյուրանոցում են»,- ասաց համայնքապետը:
Համայնքապետը նշեց, որ երեկ կապ է հաստատվել բնակչի հետ, որն ասել է, թե երկու անգամ է թեստավորվել, մեկի պատասխանը բացասական է եղել, մյուսինը՝ դրական, հիմա նորից պետք է թեստավորվի: Սարգսյանի փոխանցմամբ՝ Ջրափիում խուճապ չկա, քանի որ բնակիչները առանձնապես շփում չեն ունեցել վարակակրի հետ:
«Մեկ մարդ է շփվել իրենց հետ, բայց իրեն լավ է զգում: Դեռ չկան խոսակցություններ, թե մեկ ուրիշն էլ է իրեն վատ զգում կամ ջերմություն ունի»,- ասաց նա և հավելեց, որ կորոնավիրուս է հաստատվել Մարալիկի ԱԻՆ-ում աշխատողներից ևս մեկի մոտ: Նա Շիրակավան համայնքից է: