Ուկրաինացի քաղաքագետը հայկական համայնքն անվանել է ամենաազդեցիկներից մեկն Ուկրաինայում (տեսանյութ)
Ուկրաինացի քաղաքագետ Ալեքսեյ Յակուբինը տեղի հեռուստատեսությամբ հեռարձակվող «Միջազգային համայնապատկեր Նադեժդա Սասսի հետ» հաղորդման շրջանակներում ընդգծել է Ուկրաինայի հայ համայնքի ակտիվ գործունեությունը:
Ինչպես փոխանցում է AnalitikaUA.net-ը, պատասխանելով ուկրաինական դիվանագիտության վրա այս կամ այն կերպ ազդեցություն ունեցող ազգային համայնքների մասին հարցին՝ Յակուբինն ընդգծել է, որ դրանց թվում են հրեական և հայկական համայնքները: Վերջինս հավելել է, որ մասնակցել է հայկական համայնքի կազմակերպած միջոցառումներին:
Ուկրաինայում, Վրաստանում և Հայաստանում տնտեսական զարգացման և բարեփոխումների արդյունքները քննարկելիս փորձագետն ընդգծել է, որ Ուկրաինայում «վաճառում էին» Վրաստանում տեղի ունեցած բարեփոխումների պատկերը: «Վրաստանում հաջողվեց այդ ամենն անել, մեգահյուրանոցներ Բաթումիում և այլն:
Որպես փորձագետ, որը սովոր է ստուգել լսած հայտարարությունները, վերցրել եմ Համաշխարհային բանկի տվյալները և նայել եմ Վրաստանի ՀՆԱ-ի ցուցանիշները Սաակաշվիլիի օրոք և Հայաստանի ցուցանիշիները նույն ժամանակահատվածում, և ստացվում է, որ Վրաստանում Սաակաշվիլիի օրոք ՀՆԱ-ն աճել է 2.5 անգամ, Հայաստանում՝ 3.3 անգամ»,- ասել է քաղաքագետը՝ հավելելով, որ դեռ պետք է հաշվի առնել այն, որ Հայաստանը չունի ելք դեպի ծով:
Պարբերականը նշում է, որ հաղորդմանը մասնակցել է Կիևի մարզի նախկին նահանգապետ Միխայլո Բնո-Այրիյանը: