Դաշտը բացվում է խոշոր խաղացողների համար, որոնց ժամանակին մեր վարչապետն անվանում էր թալանչիներ և օլիգարխներ. Գևորգ Գորգիսյանը՝ պետական մրցույթներին բանկային երաշխիք ներկայացնելու որոշման մասին
Արտակարգ դրության հայտարարումից հետո անընդհատ հայտարարվում է, որ պետք է կապիտալ շինարարություն լինի, որտեղ Կառավարությունը մեծ գումարներ կներդնի, քաղաքացիներն էլ աշխատանք կունենան, բայց ժամանակն անցնում է, իսկ այդ շինարարությունները չեն սկսվել: Այս մասին իր ֆեյսբուքյան էջում հրապարակված տեսանյութում հայտարարեց պատգամավոր Գևորգ Գորգիսյանը:
Նա նշեց՝ Կառավարության նոր որոշմամբ՝ 2020-ի հունվարի 1-ից շինարարության պետական մրցույթներին մասնակցելու համար պետք է շինարարության ամբողջ ծավալի գումարի չափով ներկայացվի բանկային երաշխիք, ինչը, ըստ Գորգիսյանի, շատ հաճախ փոքր և միջին ձեռնարկությւոնների համար լուրջ խնդիր է դառնում, որովհետև նրանք, չունենալով այդքան կուտակած միջոցներ, ստիպված են լինում իրենց, իրենց աշխատակիցների կամ բարեկամների տունը գրավադրել, որպեսզի բանկը տա համապատասխան երաշխիք:
«Ստեղծվել է շատ հարմարավետ իրավիճակ խոշոր խաղացողների համար, որոնք ոչ միայն խոշոր, այլև նույնիսկ միջին մրցույթներին են մասնակցում, քանի որ չունեն գումարի խնդիր ու կարողանում են հեշտությամբ ներկայացնել բանկային երաշխիքները, այդպիսով շուկայից դուրս են մղում միջին և փոքր խաղացողներին»,-ասաց պատգամավորը՝ նշելով, թե այդ խնդիրների մասին իրենք բազմիցս բարձրաձայնել են, բայց Կառավարությունը լուծումներ առաջարկելու փոխարեն մոտավորապես հակառակ քայլն է արել:
«Մայիսի 7-ին Կառավարությունը նոր որոշում է ընդունել, որով սահմանվել են մի քանի խնդրահարույց կետեր: Առաջինը՝ մինչև 150 միլիոն դրամանոց բոլոր մրցույթներն այսուհետ ի վիճակի չեն լինելու կատարել համայնքները, այլ իրականացվելու են մարզպետարանի կողմից»,-ասաց նա՝ ներկայացնելով մի օրինակ. «Եթե մի գյուղի մանկապարտեզի շինարարությունն արժեր 10 միլիոն դրամ, և տնտեսավարողը կարող էր չներկայացնել բանկային երաշխիք, իսկ 20-30 միլիոնի դեպքում կարող էր սեփական գույքը գրավադրել և բանկային երաշխիք ստանալ, նոր որոշումից հետո բոլոր համայնքների բոլոր մանկապարտեզների վերանորոգումը իրականցվելու է մի մրցույթով, եթե մի մանկապարտեզն, օրինակ, արժե 20 միլիոն, 4 մանկապարտեզի դեպքում կդառնա 80 միլիոն, և փոքր ու միջին տնտեսվարողները այլևս ի վիճակի չեն լինի ներկայացնել բանկային երաշխիք, ու կրկին դաշտը բացվում է խոշոր խաղացողների համար, որոնց ժամանակին մեր վարչապետն անվանում էր թալանչիներ և օլիգարխներ»,-ասաց նա՝ նշելով, թե հիմա համակարգը, փաստորեն, դառնում է այնպիսին, որ բարենպաստ պայմաններ են ստեղծվում խոշոր կազմակերպությունների համար, և նրանք ավելի հեշտությամբ փոքրերին կհանեն «խաղադաշտից»:
Պատգամավորի դիտարկմամբ՝ խնդրահարույց են նաև ժամկետները, ու հնարավոր է՝բոլոր գործընթացների հաղթահարումից հետո շինարարական աշխատանքներ սկսվեն միայն աշնանը: «Մայիսն ավարտվում է, սկսվում է ամառը, և նախատեսված շինարարության չնչին մասն է սկսվել, և եթե այսպես շարունակվի, Կառավարության այս որոշումներով առաջնորդվենք, ապա աշնան կեսերին նոր կսկսվեն շինաշխատանքները»,-նկատեց նա:
«Հուսով ենք՝ Կառավարությունը ի վերջո իր ուշադրությունը կհրավիրի այս խնդրի վրա և կձեռնարկի միջոցներ, որովհետև այսօր՝ այս ճգնաժամային իրավիճակում մեր քաղաքացիների համար օրհասական է, որ նման մեծ գումարներ ներարկվեն տնտեսության մեջ, որ շինարարություններն օր առաջ սկսվեն»,-ամփոփեց Գևորգ Գորգիսյանը:
Մանրամասները՝ տեսանյութում: