Ազատման դիմումը հետ վերցնելու համար եռօրյա ժամկետ կա, այդ երեք օրը վաղուց անցել է. ԲՈԿ նախագահ Սմբատ Գոգյանը՝ պաշտոնից ազատման դիմումը հետ վերցնելու հնարավորության մասին
Ազատման դիմումը հետ վերցնելու համար, ինչքան գիտեմ, եռօրյա ժամկետ կա, այդ երեք օրը վաղուց անցել է: Այս մասին ԱԺ-ում Կրթության, գիտության, մշակույթի, սպորտի, սփյուռքի և երիտասարդության հարցերի հանձնաժողովի արտահերթ, դռնփակ նիստից հետո լրագրողների հետ զրույցում հայտարարեց ԲՈԿ նախագահ Սմբատ Գոգյանը՝ անդրադառնալով հարցին՝ հնարավո՞ր է՝ ազատման դիմումը հետ վերցնի:
Հարցին՝ այսինքն՝ ոլորտը լքում է՝ ի հակադրություն իրեն աջակցող հայտարարությունների, ԲՈԿ նախագահն արձագանքեց. «Հայտնվող աջակցությունները իրավական ուժ չունեն, հետևաբար իրավական հետևանք էլ չունեն, բայց, ինչ խոսք, ինձ հաճելի էր գիտակցել, որ ունեմ այդ աջակցությունը»:
Նա նշեց, թե հանձնաժողովում հանդիպումը բավականին երկար տևեց. «Չէի կարծում, որ այսքան երկար կտևի: Զրույցը երկար էր, բավականաչափ բովանդակալից, շատ հարցեր քննարկեցինք, և համակարգային խնդիրներ կան, որ պետք է լուծվեն»:
Դիտարկմանը, թե ինքը խոսում է արժեքային տարբերությունների մասին, ի՞նչ տարբերությունների մասին է խոսքը, և ինչի՞ է բախվել, որին չէր սպասում, Գոգյանը պատասխանեց.
«Այսպիսի թևավոր խոսք կա՝ ում էլ երեք օր ձերբակալեն, բանտ նստեցնեն, ինքը կհասկանա՝ ինչի համար էր, ոչ մեկն իրականում սուրբ չէ, բայց ստանձնելով ԲՈԿ նախագահի պաշտոնը՝ ես սահմանեցի բարձր շեմ, և ակնկալում եմ, որ համակարգի բոլոր մարդիկ պետք է հետևեն այդ չափանիշին, հատկապես որ մեր 2018թ. հեղափոխությունը հենց արժեքային հեղափոխություն էր, և միայն այդ մոտիվացիայով և լոզունգով ես ստանձնեցի այդ պաշտոնը, և ակնկալում եմ նույնը բոլորից: Եթե դու չես կրում մի արժեք, այն տարածել չես կարող»,-ասաց նա:
Հարցին՝ նա նպատակահարմար չհամարե՞ց պայքարել առկա խնդիրների դեմ, թե՞ կարծում էր՝ անիմաստ է, չի ստացվի, Գոգյանը պատասխանեց, թե ընտրել է պայքարի այդ եղանակը: Հարցին էլ՝ իր կարծիքով՝ այդ եղանակը կազդի՞, ԲՈԿ նախագահն արձագանքեց. «Եթե այստեղ եմ, ուրեմն՝ ինչ-որ կերպ արդեն ազդել է»:
Անդրադառնալով դիտարկմանը, թե խոսակցություններ կան, որ իշխանությունները ԲՈԿ-ին «ստիպում են» են գտնել արտագրություններ նախկին իշխանությունների ներկայացուցիչների ատենախոսություններում, Գոգյանն ասաց, թե մեկուկես տարի է՝ այդ խոսակցությունները մեկնաբանում է. «Անցյալում շատ բաներ են տեղի ունեցել, և մենք չենք կարող այդ ամբողջ անցյալն ուսումնասիրել, բայց ցանկացած մարդ իրավունք ունի ուրիշի արածի վերաբերյալ իր կարծիքը հայտնել»,-ասաց նա:
Հիշեցնենք՝ ԲՈԿ նախագահ Սմբատ Գոգյանը իր հրաժարականի դիմումի հիմնավորման մեջ նշել էր, թե պատճառներից մեկն էլ այն է, որ Հայաստանի պետական տնտեսագիտական համալսարանի ռեկտորի ժամանակավոր պաշտոնակատարի դոկտորական աշխատանքում առկա են ակնհայտ արտագրություններ ու թարգմանություններ, և որ ռեկտորը համապատասխան կապերի ու հովանավորչության միջոցով շարունակում է պաշտոնավարել։