Քննարկումը բավականին կառուցողական էր, հարկ եղած դեպքում ԿԳՄՍ նախարարին ևս կհրավիրենք ԱԺ. Մխիթար Հայրապետյանը՝ ԲՈԿ նախագահի և ԿԳՄՍ փոխնախարարի մասնակցությամբ նիստի մասին
Քննարկումը բավականին կառուցողական անցավ, թեպետ տեղ-տեղ կարող էին նաև հուզական լինել, բայց ես բավականին գոհ եմ և առավել քան վստահ եմ, որ հետագա մեր գործունեության համար բավական օգտակար և արդյունավետ աշխատանք իրականացրինք այսօր: Այս մասին ԱԺ-ում Կրթության, գիտության, մշակույթի, սպորտի, սփյուռքի և երիտասարդության հարցերի հանձնաժողովի արտահերթ, դռնփակ նիստից հետո լրագրողների հետ զրույցում հայտարարեց հանձնաժողովի նախագահ Մխիթար Հայրապետյանը:
Հիշեցնենք՝ հանձնաժողով էին հրավիրվել ԲՈԿ նախագահ Սմբատ Գոգյանը և ԿԳՄՍ փոխնախարար Գրիշա Թամրազյանը: Նա նշեց՝ Գոգյանի հրաժարականի պատճաներից երկրորդը վերաբերում էր ՀՊՏՀ-ում հովանավորչությանը
Նա չբացառեց, որ ապագայում ևս կլինեն քննարկումներ նույն թեմայով: «Կարծում եմ՝ այսօր ոչ բոլոր հարցերը հասցրինք սպառել: Քննարկման փակ ձևաչափում և՛ ԲՈԿ նախագահը, և՛ ԿԳՄՍ փոխնախարարը առավելագույնս բաց ներկայացրին իրենց քննադատությունները և մեղադրանքները, մյուս կողմը՝ հակափաստարկները»,-ասաց նա՝ նշելով նաև, որ դռնփակ ձևաչափը ենթադրում է, որ այս փուլում չի կարող կիսվել քննարկման բովանդակության մանրամասներով:
Հարցին՝ հնարավո՞ր է՝ Գոգյանը հետ վերցնի ազատման դիմումը, Հայրապետյանը նշեց, թե այս պահին ասել չի կարող:
Հարցին՝ ավելի արդյունավետ չէ՞ր լինի, եթե քննարկմանը ներկա լիներ նաև ԿԳՄՍ նախարարը, Հայրապետյանը պատասխանեց. «Հանուն արդարության ասեմ, որ Արայիկ Հարությունյանը ԱԺ ամենաշատ այցելած նախարարն է, և սա նաև խոսում է մեր հանձնաժողովի և տվյալ գերատեսչության միջև սերտ համագործակցության մասին, այս իմաստով ճիշտ չէ խոսել, որ չի ցանկացել կամ որևէ կաշկանդվածություն կա: Նպատակահարմար ենք համարել, որ կոնկրետ խնդրի հասցեատերը ներկայանա ԱԺ, նրան ուղղվեն հարցերը: Հարկ եղած դեպքում, չկասկածեք, որ ԱԺ կհրավիրվի նաև նախարարը»,-ասաց նա:
Հարցին՝ ինչպես է գնահատում, որ սպորտի ներկայացուցիչները ֆեյսբուքյան գրառումներ են կատարել՝ ի աջակցություն Գրիշա Թամրազյանի, Հայրապետյանը պատասխանեց, թե դա համարում է հետքայլ. «Ես չեմ ողջունում նման մոտեցումները, և ես հույս ունեմ, որ ապագայում թո՛ մարզիկները, թե՛ արվեստագետները, թե՛ ռեկտորները հաշվի կառնեն, որ դեռևս կոմունիզմից և Հանրապետական իշխանության օրոք հատկապես առավել վառ և ցայտուն այդ մշակույթը տեղ չունի մերօրյա Հայաստանում, և ուրախ եմ, որ նաև փոխնախարարը դիրքորոշում ունի սրա հետ կապված: Կարծում եմ՝ եթե խոսքը ՀՊՏՀ-ի և հովանավորչության մասին է, ապա մազիկները գուցեև պետք է զերծ մնան նման հայտարարություններ անելուց»,-ասաց Մխիթար Հայրապետյանը:
Հիշեցնենք՝ ԲՈԿ նախագահ Սմբատ Գոգյանը իր հրաժարականի դիմումի հիմնավորման մեջ նշել էր, թե պատճառներից մեկն էլ այն է, որ Հայաստանի պետական տնտեսագիտական համալսարանի ռեկտորի ժամանակավոր պաշտոնակատարի դոկտորական աշխատանքում առկա են ակնհայտ արտագրություններ ու թարգմանություններ, և որ ռեկտորը համապատասխան կապերի ու հովանավորչության միջոցով շարունակում է պաշտոնավարել: