Եթե բոլոր ոլորտներում կարդինալ փոփոխություններ չլինեն, մենք լուրջ խնդիրներ ենք ունենալու. Լևոն Մարտիրոսյան
Դեռ երկու տարի առաջ Հայաստանում տեղի ունեցած փոփոխություններից Սփյուռքում, գոնե՝ Կանադայի համայնքում, իրականում, որևէ ոգևորություն չկար, ինչպես այստեղ էին ներկայացնում։ Այս մասին Անժելա Թովմասյանի՝ «Արմնյուզ» ՀԸ «Հայելու առաջ» հեղինակային հաղորդաշարի ժամանակ ասել է ԱԺ նախկին պատգամավոր, Կանադայում Հայաստանի նախկին դեսպան Լևոն Մարտիրոսյանը՝ խոսելով Հայաստանում տեղի ունեցած ներքաղաքական փոփոխությունների մասին։
Ըստ քաղաքական գործչի՝ Սփյուռքի չոգևորված լինելու ցուցիչն էր նաև հետագայում Հայաստան համահայկական հիմնադրամին Սփյուռքից նվիրատվությունների քանակը։
Խոսելով նոր դեսպանների ու դեսպանատների նկատմամբ իշխանության վարած քաղաքականության մասին՝ մասնավորապես՝ դեսպանների մեծ մասին հետ կանչեցին, իսկ մի քանի դեսպանատներ էլ փակվեցին, նախկին դեսպանը նշել է․ «Դեսպանատների փակումը մոտեցման խնդիր է։ Ես, որ լինեի, բազմաթիվ դեսպանատներ կփակեի, որովհետև տարբեր երկրների հետ կարելի է հարաբերություններ ունենալ առանց դեսպանատների։ Արտաքին քաղաքականությունը դեսպանատների ու դեսպանների գործը չէ միայն»։
Անդրադառնալով Հայաստանի ներքաղաքական իրավիճակին ու ներդրումային քաղաքականությանը՝ Լևոն Մարտիրոսյանն ասել է․«Երբ խոսվում է կոռուպցիայի դեմ արդյունավետ պայքարի, ներդրումային բաց քաղաքականության ու բարեփոխումների մասին, այս ֆոնին մենք ունենք ներդրումների շեշտակի անկում»։
Հարցին՝ ի՞նչն է պատճառը, որ ներդրումներ չեն գալիս Հայաստան, արդյո՞ք որևէ նպաստավոր պայման ստեղծված չէ, նախկին դեսպանը պատասխանել է․ «Ներդրումների ոլորտը շատ նուրբ ոլորտ է։ Օտարերկրյա ներդրողները բազմափորձ գործիչներ են, որոնք շատ զգայուն են տարբեր երկրների ներքին քաղաքականության նկատմամբ։ Կոռուպցիայի դեմ պայքար կա, բայց այն անհրաժեշտ վճռականություն չունի»։
Լևոն Մարտիրոսյանն ընդգծում է, որ Հայաստանը հիմա գտնվում է միջազգային հեղինակավոր «Թրանսփարենսի Ինթերնեյշնլ» կազմակերպության ինդեքսի 77-րդ հորիզոնականում․ «77-րդ տեղում գտնվում են այն երկրները, որտեղ կա համակարգված կոռուպցիա։ Այս պահին միջազգային այս կազմակերպությունը պաշտոնապես համարում է, որ Հայաստանում կա համակարգված կոռուպցիա»։
Անդրադառնալով ՀՀ վարչապետ Նիկոլ Փաշինյանի վերջին ուղիղ եթերին և մի քանի սկանդալներին, մասնավորապես՝ ծխախոտի, ադամանդի, Լևոն Մարտիրոսյանը նշել է․ «Մի քանի անգամ լսել եմ, որ վարչապետն ասում է՝ իրենք կոռումպացված չեն իրենց կամքով։ Սա շատ սխալ մոտեցում է։ Եթե համակարգն այնպիսին է, որ քո քմահաճույքին պետք է մնա որևէ պաշտոնյայի կոռումպացված լինելը, ապա վաղ թե ուշ դու կոռումպացված կլինես»։
Ըստ քաղաքական գործչի՝ եթե այսօր բոլոր ինստիտուտները կախված են մի մարդուց, ու, եթե անգամ այսօր կոռուպցիա չկա, ապա վաղը կամ մյուս օրը լինելու է։
Լևոն Մարտիրոսյանի խոսքով՝ վերջին սկանդալային բացահայտումները՝ ծխախոտի, ադամանդի գործերով պետք է մինչև վերջ պարզաբանվեն․«Այս ամենին զուգահեռ, մենք խնդիրներ ունենք նաև արտաքին քաղաքականության ոլորտում, մասնավորապես՝ հայ-ռուսական հարաբերություններում»։
Նախկին դեսպանի համոզմամբ՝ եթե բոլոր ոլորտներում այսօր կարդինալ փոփոխություններ չլինեն, մենք լուրջ խնդիրներ ենք ունենալու։