Բոլոր երկրներն ունեն առողջապահության նախարարներ, որոնք մտահոգ են իրենց քաղաքացիների առողջությամբ, իսկ մենք ունենք ՀՀ-ում ԱՀԿ ներկայացուցիչ, որը որևէ բան չի անում, քան ԱՀԿ-ի հրահանգները․ Գ․ Գորգիսյան
Կարծում եմ՝ Կառավարությունը պարտավոր է կորոնավիրուսային հիվանդության իրավիճակի վերաբերյալ գոնե խորհրդակցել համապատասխան մարդկանց հետ, որովհետև, ցավոք սրտի, բոլոր երկրներն ունեն առողջապահության նախարարներ, իսկ մենք ունենք առողջապահության համաշխարհային կազմակերպության ներկայացուցիչ ՀՀ-ում։ Tert.am-ի հետ զրույցում նման կարծիք հայտնեց ԱԺ «Լուսավոր Հայաստան» խմբակցության քարտուղար Գևորգ Գորգիսյանը։
«Բոլոր երկրներն ունեն առողջապահության նախարարներ, որոնք մտահոգ են իրենց երկրի քաղաքացիների առողջությամբ, անում են հետազոտություններ, խորհրդակցում են համապատասխան գիտնականների հետ, կայացնում որոշումներ։ Մենք ունենք առողջապահության համաշխարհային կազմակերպության ներկայացուցիչ ՀՀ-ում, որը որևէ բան չի անում, քան ԱՀԿ-ի ուղիղ հրահանգները։ Այս պարագայում այլ արդյունք, քան ունենք, ես չեմ կարծում, որ կարող էր լինել»,- նշեց նա։
Հիշեցնենք, որ ՀՀ-ում մեկ օրում կորոնավիրուսով վարակվելու և մահվան ռեկորդային թվեր են արձանագրվել։ Հունիսի 2-ի դրությամբ հաստատվել է կորոնավիրուսով վարակման 517 նոր դեպք, վարակվածների ընդհանուր թիվը հասել է 10 009-ի: Մեկ օրում կորոնավիրուսի հետևանքով մահացել է 19 քաղաքացի, մահացածների թիվը 158 է:
Գևորգ Գորգիսյանի կարծիքով՝ ՀՀ-ում կորոնավիրուսային հիվանդության իրավիճակը Կառավարության կողմից անհրաժեշտ քայլերի ուշ ձեռնարկման և անլրջության հետևանքով է։
«Այն պահին, երբ Կառավարությունը պետք է այդ խիստ քայլերը ձեռնարկեր, նրանք անլրջությամբ էին զբաղված, քարոզարշավ էին անում և այլ նման բաներ։ Երբ կարելի էր դեռ խիստ սահմանափակումներով վիրուսի տարածման դեմն առնել, համավարակը վերահսկելի դարձնել և չունենալ այսքան զոհ, վարակի այսքան տարածում, մեր Կառավարությունը՝ ի դեմս վարչապետի և առողջապահության նախարարի, հայտարարում էին՝ սա լուրջ վիրուս չէ, կորոնավիրուսն ում շունն է, պինցետով հանելու ենք, օղիով բուժելու ենք և այլն։ Մենք կոչ էինք անում՝ Իրանից տուրիստական հոսքերը պետք է փակել, Իտալիայից չվերթները պետք է չեղարկել, այն ժամանակ ասում էին՝ դրա կարիքը չկա, իսկ հիմա այս դիմակների համատարած դնելն արդեն չի օգնելու, արդեն ուշ է»,- ասաց պատգամավորը։
Հարցին, թե խիստ սահմանափակումների վերադառնալու, կարանտին հայտարարելու անհրաժեշտություն չկա՝ հաշվի առնելով օրեցօր աճող թվերը, Գևորգ Գորգիսյանը պատասխանեց․ «Բարդ հարց է, դրա համար առնվազն պետք է համաճարակաբան լինել։ Եթե նույնիսկ այսօր ամենախիստ սահմանափակումները մտցնենք, վարակվածների թիվը, միգուցե, դադարի աճել, բայց արդեն մեծ թվով վարակվածներ կան, որոնք դեռ բացահայտված չեն, դա արդեն չեղարկել չենք կարող։ Հիմա ինչ էլ անեն, ուշ է, կարծում եմ, արդեն բանը բանից անցել է, ջինը դուրս է եկել շշից, ու սրա դեմն ինչպես կարելի է առնել, ես չգիտեմ»։
Պատգամավորի խոսքով՝ նոր խիստ սահմանափակումների դեպքում առաջանալու են տնտեսական հետևանքների, մարդկանց սոցիալական վիճակի վատթարացման հարցերը։ Ըստ նրա՝ սահմանափակումների հետևանքով սոցիալական խնդիրները մեղմելու Կառավարության քայլերը ձախողված էին․ «Այն չեղավ թիրախային, թեև անունն այդպես էր։ Աջակցություն ստացան նրանք, ովքեր դրա կարիքը չունեին, և բազմաթիվ մարդիկ ինչ-որ մանր ֆիլտրերի պատճառով դուրս մնացին այդ ամենից»,- ասաց նա։
«Տնտեսությունը ինչքան կդիմանա նոր շատ խիստ սահմանափակումներին, դա մյուս հարցն է։ Եթե մարդը չունի ապրուստի միջոց և պետք է գնա աշխատանքի, գնում է հասարակական տրանսպորտով, որտեղ բնականաբար 1․5-2 մետր սոցիալական հեռավորություն չի պահպանվում։ Բանկերում անընդհատ հերթեր են՝ վարկային տարբեր գործարքների հետ կապված։ Սրանք շարունակում են վարակի ակտիվ օջախներ մնալ, բայց չլինելն էլ չենք կարող թույլ տալ, որովետև ի՞նչ արվի, եթե մարդիկ չգնան աշխատանքի։ Այս դեպքում պետք է նրանց ապրուստի միջոց տրամադրվի, բայց տեսել ենք Կառավարության ձախողված փորձը։ Հուսով եմ՝ մարդիկ, ի տարբերություն Կառավարությանը, ավելի բարձր գիտակցություն կդրսևորեն և ավելի զգուշավոր կլինեն»,- ասաց Գևորգ Գորգիսյանը։