Շարունակվող ցույցերի ֆոնին Լոս Անջելեսի շրջանում գրեթե 2.7 հազար մարդ է ձերբակալվել. Los Angeles Times
ԱՄՆ Կալիֆոռնիա նահանգի Լոս Անջելեսի շրջանում ուրբաթ օրվանից սկսած գրեթե 2.7 հազար մարդ է ձերբակալվել: Այս մասին հայտնում է РИА Новости-ն՝ հղում տալով Los Angeles Times պարբերականին:
Համաձայն թերթի տվյալների՝ ցույցերի ժամանակ՝ ուրբաթ օրվանից մինչև երեքշաբթի առավոտյան, նվազագույնը 2216 մարդ ձերբակալվել է Լոս Անջելեսում: Եվս 475 մարդ ձերբակալվել է Սանտա Մոնիկա և Լոնգ Բիչ քաղաքներում:
Նրանց մեծամասնությունը ձերբակալվել է ոստիկանությանը չենթարկվելու, պարետային ժամը խախտելու, ինչպես նաև գողություն անելու, իրավապահների վրա հարձակվելու և դիակապտության համար: Շրջանի իշխանությունները նաև հաղորդել են, որ պարետային ժամը երկարաձգվել է և կգործի երեքշաբթի 18:00-ից(երևանյան ժամանակով՝ 05:00, հունիսի 3) մինչև չորեքշաբթի՝ 6:00-ն (17:00, հունիսի 3):
Հիշեցնենք, որ ԱՄՆ մի շարք քաղաքներում պարետային ժամ է սահմանվել՝ պայմանավորված սևամորթ Ջորջ Ֆլոյդի սպանությունից հետո փողոց դուրս եկած ցուցարարների բազմությամբ, որոնք նաև անկարգություններ և ավերածություններ են իրականացնում փողոցներում:
Ջորջ Ֆլոյդ անունով սևամորթ տղամարդուն ձերբակալության ժամանակ խեղդամահ է արել Մինեապոլիսի ոստիկանության նախկին սպա Դերեկ Չաուվինը, որն այժմ ձերբակալված է: Հազարավոր ցուցարարներ տարբեր քաղաքներում պահանջում են խստագույնս պատժել Չաուվինին: