Վարչապետը, որի ղեկավարած երկրի առողջապահական համակարգը կոլապսի եզրին է, որի տնտեսությունն ամսական հարյուրավոր միլիոն դոլարի վնաս է կրում, զբաղված է նկարներ հավաքելով․ Աբրահամ Գասպարյան
Ոստիկանապետի՝ մոտ մեկամյա պաշտոնավարումը ցույց տվեց, որ իրավապահ համակարգում մշուշոտ վիճակ է, ոստիկանն այդպես էլ չիմացավ՝ ո՞րն է քաղաքացու հետ խոսելու կամ քաղաքակիրթ վարվելու մեթոդը։ Այս մասին նշել է «Արմնյուզ» ՀԸ «Երեկոյան լուրեր Աբրահամ Գասպարյանի հետ» հաղորդման մեկնաբան Աբրահամ Գասպարյանը ՝անդրադառնալով ոստիկանների և քաղաքացու միջև եղած միջադեպին։
«Երբ ասում ու ոգևորվում ենք, որ նման դեպքերն ու երևույթներն անընդունելի են, չի նշանակում, որ նախկինում ամեն ինչ հեշտ է եղել: Ոստիկանների գործողությունների իրավաչափությունը միշտ էլ վիճարկելի է եղել: Բայց մենք առաջ ենք նայում, ոչ թե գորշ ներկան համեմատում անցյալի գաղջի հետ:
Լավ է՝ «խեղդվում եմ» արտահայտությունը լսվեց ու դիմակ չդնող քաղաքացին Ջորջ Ֆլոյդի օրը չընկավ: Սոցցանցերում այս թեման այսօր լայնորեն քննարկվեց: Իշխանությունն ամեն օր հետաքրքիր թեմա է տալիս քննարկման՝ մարդկանց զբաղեցնելու և, գուցե, տխուր իրականության մասին չմտածելու»,- ասաց Գասպարյանը և այնուհետև անդրադարձավ երեկ վարչապետի ֆեյսբուքյան էջում հրապարակված՝ առանց դիմակի մետրո նստած աղջկա լուսանկարի վերաբերյալ հնչած մեկնաբանություններին.
«Վարչապետը, որի ղեկավարած երկրի առողջապահական համակարգը կոլապսի եզրին է, որի տնտեսությունն ամսական հարյուրավոր միլիոն դոլարի վնաս է կրում, որի քաղաքացին գրեթե չի աշխատում, փող չունի, ոչ էլ՝ հեռանկար, սոված է, որի բժիշկը հյուծված է, հիվանդանոցները՝ վարակվածի չեն ընդունում, իսկ ինքը... նկարներ ու լայքեր հավաքելով է զբաղված»:
Աբրահամ Գասպարյանը դիմեց վարչապետ Նիկոլ Փաշինյանին՝ արդյոք ճի՞շտ է համավարակի պայմանում զբաղվել ֆեյսբուքում նկարներ հրապարակելով և ստատուսներ գրելով. «Պարոն Փաշինյան, կարծում եք, որ ճի՞շտ եք վարվում, միաբջիջների բանակի ֆեյսբուքյան քոմենթները ձեզ ո՞ւժ են տալիս, ոգևորո՞ւմ, երկրի առջև ծառացած խնդիրներն ավելի ինքնավստա՞հ եք լուծում, պետության հարցերը թողած ֆեյսբուքում ստատուս ու նկար գցելու այդքան ժամանակ ունե՞ք, չե՞ք մտածում, որ ձեր նկարների տակ լպիրշ մեկնաբանություններ թողնողներին այդ աղջկա եղբայրները կամ հայրը պարզապես կարող են ձեր իսկ սիրած բառը կիրառել՝ «սամասուդ», ձեզ պատի՞վ է բերում նման անբարոյականների համար լիդեր կամ հեղինակություն լինելը:
Դուք երկրի վարչապետ եք, բանակի հրամանատար, բարոյականության մեր ընկալումները պաշտպանող ու հարստացնող: Եվ այստեղ կապ չունի՝ նկարը հեռացրիք ձեր էջից, ներողություն խնդրեցիք, թե ոչ: Դուք անձնական տվյալների իրավունքը խախտեցիք, բայց ներողություն խնդրեցիք մարդկանցից ոչ թե, որովհետև ձեր արարքն էր վիրավորական, այլ որովհետև ձեր էջում թթու խոսք է հնչել: Ձեր չհաշվարկված քայլով աղջկան դարձրիք զոհ, խուժանն էլ՝ բարոյապես սպանեց նրան»: