«Խրախճանք ժանտախտի օրերին». նորմալ չէր պարետատան որոշումներին չհատևելը, սակայն այս ամենի ետևում իշխանության սխալ մարտավարությունն է. Թևանյանը՝ ԳՇ պետի որդու հարսանիքի մասին
Պարզ է, որ խնդիր կա վարչապետի և տարբեր պաշտոնյանների պահվածքի մեջ, բայց ես գլխավոր խնդիրը տեսնում եմ վարչապետի հայտարարությունների մեջ, երբ անլրջացրեց իրավիճակը և ցույց տվեց, որ կորոնավիրուսային պատերազմում պարտված ենք: Այս մասին այսօր Tert.am-ի հետ զրույցում ասաց «Պոլիտէկոնոմիա» հետազոտական ինստիտուտի ղեկավար, քաղաքագետ Անդրանիկ Թևանյանը՝ խոսելով արտակարգ դրության պայմաններին բարձրագույն սպայակազմի չենթարկվելու և հատկապես ԶՈւ ԳՇ պետ Արտակ Դավթյանի որդու բազմամարդ հարսանիքի մասին:
Թևանյանը չցանկացավ հարցին անձնավորված մոտենալ, սակայն շեշտեց՝ այո՛, նորմալ չէր պարետատան որոշումներին չհատևելը, սակայն ըստ նրա՝ այս ամենի ետևում իշխանության՝ ի սկզբանե սխալ մարտավարությունն է: «Փաշինյանն է գլխավոր խնդիրը եղել, Հայաստանում պետական կառույցներն իրենց դերն ու նշանակությունը կորցրել են»:
«Մենք տեսնում ենք, որ Հայաստանում գլխավոր դատախազը, դատավորը, քննիչը, ոստիկանը, անվտանգության աշխատակիցը, քաղաքապետը, վարչապետը, հիմա արդեն նույնիսկ համաճարակաբանը նույն մարդն է, որն էլ Նիկոլ Փաշինյանն է: Նա ցույց է տալիս, որ պետական ինստիտուտները ոչնչացված են, իսկ մնացած կառույցները ինչ-որ խմբեր են, որոնք տարբեր գործառույթներ են կատարում՝ բաց թողնելով իրենց իրական դերն ու պաշտոնը»,- ասաց նա և հավելեց, որ այդ խմբերը պարբերաբար հանձնաժողովների են վերածվում՝ դիմակ կրելու, սահմանադրական փոփոխությունների, Արցախի ընտրությունների և այլն:
Դիտարկմանը՝ ճի՞շտ է արդյոք պարետատան որոշումներ խախտելը, քաղաքագետը պատասխանեց՝ ոչ, սակայն խնդիրն այն է, որ հակակորոնավիրուսային քաղաքականությունն ի սկզբանե խեղկատակության է վերածված եղել․ «Այդ քաղաքականության անարդյունավետության հետևանքներն այսպես ենք տեսնում և կարելի է ասել, որ հիմա մենք գործ ունենք գլխակեր իշխանության հետ, սա ցույց է տալիս, որ պետությունը ձախողվել է կորոնավիրուսային պատերազմում: Արդեն պարտվել է այս իշխանությունը, իսկ մնացածը համարվում է «խրախճանք ժանտախտի օրերին»»,-շեշտեց Թևանյանը:
Ըստ նրա՝ իշխանության հանդեպ վստահությունը այնքան է ոչնչացվել, որ հասարակության մի հատված կա, որը չի էլ հավատում վարչապետի և իր ընտանիքի կորոնավիրուսով վարակված լինելուն: «Ավելի մեծ անվստահություն պատկերացնել հնարավոր չէ: Նա խոսքի լեգիտիմություն չունի նույնիսկ պետական համակարգում, դրա համար էլ մարդիկ այսօր հարսանիքներ են անում, վաղն էլ ուրիշ բաներ կարող են անել»: