Ինձ չի հետաքրքրում, որ ՀՀ ԶՈւ գլխավոր շտաբի պետը չի պահպանում հակահամաճարակային կանոնները, ուզում եմ, որ մեր քաղաքացիներն ավելի լուրջ լինեն, քան այսօրվա Կառավարությունը․ Մանե Թանդիլյան (տեսանյութ)
Ինձ չի հետաքրքրում, որ ՀՀ ԶՈւ գլխավոր շտաբի պետը չի պահպանում հակահամաճարակային կանոնները, ես ուզում եմ, որ մեր քաղաքացիներն ավելի լուրջ լինեն, քան այսօրվա Կառավարությունն է։ Այս մասին այսօր Ազգային ժողովում լրագրողների հետ ճեպազրույցի ժամանակ ասաց «Լուսավոր Հայաստան» խմբակցության պատգամավոր Մանե Թանդիլյանը։
Նա հիշեցրեց, որ մարտի 1-ին ՀՀ-ում արձանագրվել էր կորոնավիրուսի առաջին դեպքը, որից հետո շարունակվել էր հանրաքվեի քարոզարշավը և մարտի 13-ին միայն արտակարգ դրություն էր հայտարարվել։
«Փետրվարի վերջին, երբ ամբողջ աշխարհը խոսում էր համավարակի մասին, Հայաստանում դեռ ձեռք էին առնում այդ համավարակը։ Այստեղ է իմ զայրույթը կառավարության գործողությունների հանդեպ, որ անլրջությունը սերմանվեց, հիմա չենք կարողանում մեր քաղաքացիներին համոզել, բացատրել, որ սա լրջագույն խնդիր է։ «Թե բա դինոզավրի գրիպ», «ազգ-էպիդեմիոլոգ», ու մինչև կպարզեին, թե «կորոնավիրուսն ում շունն է», եկավ հասավ բոլորիս դռները։ Ես խնդրում եմ մեր քաղաքացիներին ավելի լուրջ վերաբերվել համավարակին, քան Կառավարությունն է վերաբերվել։ Ավելի գիտակից, ողջամիտ և բանիմաց լինել»,- ասաց նա։
Հիշեցնենք, որ Հայաստանում հունիսի 8-ի դրությամբ կորոնավիրուսով վարակման դեպքերի ընդհանուր թիվը 13325 է, իսկ կորոնավիրուսի հետևանքով մահացել է 211 մարդ:
Մանե Թանդիլյանի խոսքով՝ ստեղված իրավիճակը Կառավարության գործողությունների կամ անգործության հետևանքով է։ Իրանի հետ սահմանի փակումը, Իտալիայից չվերթերի չեղարկումը, ըստ նրա՝ ուշացած են արվել։
«Այսօր Կառավարությունը տոտալ դանդաղկոտության, հապաղման և որոշ դեպքերում անգործության ձևաչափի մեջ է։ Ցավոք սրտի, դա ակնհայտ դարձավ համավարակի պայմաններում և արժեցավ կյանքեր։ Բացի ֆեյսբուքյան ստատուսներից, եթե այլ բանով կառավարությունը լուրջ զբաղվեր, կլիներ բացարձակ այլ պատկեր, համոզված եմ»,- նշեց պատգամավորը։
Նախօրեին Վանաձորում «Լուսավոր Հայաստան» խմբակցությունը նիստ է անցկացրել, որտեղ քննարկել է առաջիկա անելիքները։
«Քննարկվել է համավարակի դեմ պայքարը որպես առաջնահերթություն այսօրվա քաղաքական օրակարգում դիտարկելը և այն ճանապարհային քարտեզը, որով մենք պատրաստվում ենք քաղաքական պատասխանատվության ենթարկել բոլոր այն պատասխանատուներին, ովքեր ձախողել են համավարակի դեմ պայքարը և որի հետևանքով ունենք այսօրվա պատկերը և մարդկային կյանքերի կորուստները։ Բայցևայնպես, Կառավարությունը պետք է կարողանա այսօր հաղթահարել համավարակը, որ նոր կարողանանք քննարկել այլ առաջնահերթություններ՝ որպես քաղաքական օրակարգ»,- ասաց Մանե Թանդիլյանը։